നെടുങ്കണ്ടം: യുദ്ധമുഖത്തെ ദിവസങ്ങള്‍ നീണ്ടു നിന്ന് കഷ്ടതകള്‍ക്കൊടുവില്‍ നാട്ടില്‍ എത്താനായതിന്റെ ആശ്വാസത്തില്‍ ലക്ഷ്മി. ഇന്ത്യന്‍ എംബസിയുടെ സഹായത്താലാണ് ഉക്രൈനിലെ യുദ്ധമുഖത്ത് നിന്ന് രാമക്കല്‍മേട്ടിലെ ബാലന്‍ പിള്ള സിറ്റിയിലെ വീട്ടില്‍ ലക്ഷ്മി എത്തിയത്.
5 മാസം മുന്‍പാണ് ഉക്രയിനിലെ കാര്‍ഗിവ് യൂണിവേഴ്‌സിറ്റിയില്‍ ഒന്നാം വര്‍ഷ എംബിബിഎസിന് ചേര്‍ന്നത്. യുദ്ധം ആരംഭിച്ചപ്പോള്‍ മുതല്‍ കാര്‍ഗീവില്‍ ഹോസ്റ്റലിന്റെ ബംഗറില്‍ തന്നെയായിരുന്നു താമസം.
കഴിഞ്ഞ 2ന് 60 കുട്ടികളുടെ ഗ്രൂപ്പില്‍ 150 കിലോമീറ്റര്‍ അകലെയുള്ള റെയില്‍വേ സ്റ്റേഷനില്‍ എത്തി അവിടെ നിന്ന് ട്രയിന്‍ മാര്‍ഗ്ഗം പോളണ്ട് അതിര്‍ത്തിയില്‍ എത്തിയത്. 7 ദിവസത്തോളം കാര്യമായി ഭക്ഷണം ലഭിക്കാതെ കുറച്ച് മാത്രം വെള്ളം കുടിച്ചാണ് ജീവന്‍ നിലനിര്‍ത്തിയത്. പിന്നീട് ട്രയിനില്‍ ആളുകളെ കുത്തിനിറച്ചാണ് പോളണ്ട് അതിര്‍ത്തിയിലേക്ക് എത്തിച്ചത്. ഇതിനിടെ ഒപ്പമുണ്ടായിരുന്ന ചിലരെ ട്രയിനില്‍ നിന്ന് പുറത്താക്കി. പിന്നീട് ഒറ്റക്കാലില്‍ നിന്നാണ് അതിര്‍ത്തി കടന്നതെന്നും ലക്ഷ്മി ജന്മഭൂമിയോട് പറഞ്ഞു.
ഇവിടെ എത്തി മലയാളി ആണെന്ന് അറിയിച്ചപ്പോള്‍ മുതല്‍ വലിയ സ്വീകരമാണ് തനിക്കടക്കം ലഭിച്ചതെന്ന് ലക്ഷ്മി പറയുന്നു. തുടര്‍ന്ന് ഇന്ത്യന്‍ എംബസി സ്വീകരിച്ച് എല്ലാ സൗകര്യങ്ങളും ചെയ്ത് കൊടുത്ത് വിമാന മാര്‍ഗ്ഗം ന്യൂദല്‍ഹിയില്‍ എത്തിക്കുകയാണ് ഉണ്ടായത് എന്ന് ലക്ഷ്മി പറഞ്ഞു. ഇവിടെ എത്തിയപ്പോഴും എല്ലാ സഹായവുമായി കേന്ദ്ര സര്‍ക്കാര്‍ ഒപ്പം നിന്നു.
തുടര്‍ന്നാണ് നാട്ടില്‍ എത്തി ചേര്‍ന്നത്. നാട്ടില്‍ എത്തിച്ചേരുവാന്‍ സഹായിച്ചതിന് പ്രധാനമന്ത്രി മോദിയേയും സഹായത്തിനായി എത്തിയ കേന്ദ്രമന്ത്രിമാരെയും അഭിനന്ദിക്കാനും ലക്ഷ്മി മറന്നില്ല. കാക്കനശ്ശേരില്‍ വിനോദ്-വിജയശ്രീ ദമ്പതികളുടെ ഇളയ മകളാണ് ലക്ഷ്മി.
ജില്ലയിലെ ആര്‍എസ്എസ് കാര്യകര്‍ത്താക്കള്‍ കേന്ദ്രമന്ത്രി വി. മുരളീധരന്‍ വഴി ലക്ഷ്മിയെ നാട്ടിലെത്തിക്കാന്‍ നേരത്തെ ഇടപെടല്‍ നടത്തിയിരുന്നു. ലക്ഷ്മിയെ നേരില്‍ കാണാനും സുഖവിവരം തിരക്കാനുമായി ആര്‍എസ്എസ് ഇടുക്കി വിഭാഗ് പ്രചാര്‍ പ്രമുഖ് അജി കുളത്തിങ്കല്‍, നെടുങ്കണ്ടം ഖണ്ഡ് സഹകാര്യവാഹ് പ്രകാശ് കെ.പി, പ്രൗഡ പ്രമുഖ് മനോജ് എന്നിവര്‍ വീട്ടിലെത്തി.
പ്രതികരിക്കാൻ ഇവിടെ എഴുതുക: