ലഖ്നോ: ഉത്തര്‍പ്രദേശ് തെരഞ്ഞെടുപ്പ് പ്രചാരണത്തിനിടയില്‍ കാശി വിശ്വനാഥ ക്ഷേത്രത്തിലെ ദര്‍ശനത്തിന് ശേഷം നടത്തിയ റോഡ് ഷോയില്‍ മോദി വഴിയോരത്തെ കടയില്‍ ചായ കുടിച്ച ശേഷം ചായക്കാരനെ അഭിനന്ദിക്കുന്ന വീഡിയോ വൈറലാകുന്നു.
ഈ വീഡിയോ ബിജെപി അവരുടെ ട്വിറ്റര്‍ പേജില്‍ പങ്കുവെച്ചു:
സ്വന്തം ലോക്‌സഭാ മണ്ഡലമായ വാരാണസിയിലെ റോഡ് ഷോയ്‌ക്കിടയിലാണ് സംഭവം. അസ്സി ക്രോസിംഗിലുള്ള വാരണാസിയിലെ പേര് കേട്ട ചായക്കടയിലാണ് മോദി മന്ത്രി ധര്‍മ്മേന്ദ്ര പ്രദാനോടൊപ്പം എത്തിയത്. “പപ്പു ചായ് വാല” എന്ന പേര് കേട്ട കടയിലെ കുല്‍ഹാദ് എന്ന പിടിയില്ലാത്ത കളിമണ്‍ കപ്പിലുള്ള ചായ പ്രസിദ്ധമാണ്. ചൂടു ചാട ആസ്വദിച്ച ശേഷം കടക്കാരന്റെ തലയില്‍ കൈവച്ച് അഭിനന്ദിച്ച ശേഷമാണ് മോദി മടങ്ങിയത്. ഈ വീഡിയോയാണ് തരംഗമാവുന്നത്.
മോദി കടയിലെത്തിയതില്‍ അങ്ങേയറ്റം സന്തോഷമുണ്ടെന്ന് കടയുടമ മനോജ് പ്രതികരിച്ചു. ‘എനിക്ക് വലിയ സന്തോഷം തോന്നുന്നു. പ്രധാനമന്ത്രി മോദി ഞങ്ങള്‍ക്കൊരു കവര്‍ തന്നു. അത് എന്റെ അച്ഛന് കൊടുത്തിട്ടുണ്ട്. ജോര്‍ജ് ഫെര്‍ണാണ്ടസ്, രാജ്നാഥ് സിങ് തുടങ്ങിയ ഒരുപാട് നേതാക്കള്‍ ഞങ്ങളുടെ ചായക്കടയിലെത്തിയിട്ടുണ്ട്’ – മനോജ് എഎന്‍ഐ യുപിയോട് പറഞ്ഞു. യുപിയിലെ ഏഴാം ഘട്ട വോട്ടെടുപ്പിന് മുന്നോടിയായാണ് മോദിയുടെ വാരാണസി സന്ദര്‍ശനം.
പ്രതികരിക്കാൻ ഇവിടെ എഴുതുക: