മുംബൈ : ആഢംബര കപ്പിലില് നിന്നും ലഹരിമരുന്ന് പിടിച്ചെടുത്തതുമായി ബന്ധപ്പെട്ട കേസില് ബോളീവുഡ് താരം ഷാരുഖ് ഖാന്റെ മകന് ആര്യന് ഖാനെതിരെ തെളിവില്ലെന്ന് കണ്ടെത്തല്. അന്നത്തെ അന്വേഷണ ഉദ്യോഗസ്ഥന് സമീര് വാങ്കഡെയുടെ നേതൃത്വത്തില് നടത്തിയ തെരച്ചില് ക്രമ വിരുദ്ധമാണെന്നും നാര്ക്കോട്ടിക്സ് ബ്യൂറോ പ്രത്യേക സംഘത്തിന്റെ റിപ്പോര്ട്ടില് പറയുന്നുണ്ട്. ദേശീയ മാധ്യമമാണ് ഇതുസംബന്ധിച്ച റിപ്പോര്ട്ട് പുറത്തുവിട്ടിരിക്കുന്നത്.
ആര്യന് ഖാന്റെ പക്കല് നിന്നും തെളിവായി ലഹരി മരുന്നുകള് പിടിച്ചെടുത്തിട്ടില്ല. ആര്യന്റെ മൊബൈല് ഫോണ് പിടിച്ചെടുക്കാന് പാടില്ലായിരുന്നു. വാട്സ്ആപ്പ് ചാറ്റുകളില് നിന്നും ലഹരി മാഫിയ ബന്ധം തെളിയിക്കുന്ന ഒന്നും ലഭിച്ചിട്ടില്ല. സംഭവത്തില് ഗൂഢാലോചന നടന്നിട്ടുണ്ടെന്ന വാദവും തെറ്റാണ്. കൂടാതെ എന്സിബി ഉദ്യോഗസ്ഥര് തെരച്ചില് നടത്തുന്നതിന്റെ ദൃശ്യങ്ങള് ചിത്രീകരിച്ചിട്ടില്ലെന്നും റിപ്പോര്ട്ടില് ആരോപിക്കുന്നുണ്ട്.
കഴിഞ്ഞ ഒക്ടോബര് മൂന്നിനാണ് ആര്യന് ഖാന് ഉള്പ്പടെയുള്ള സംഘത്തെ ആഢംബര കപ്പലില് നിന്നും എന്സിബി പിടികൂടുന്നത്. മുംബൈ തീരത്ത് കോര്ഡേലിയ ഇംപ്രസ എന്ന ആഡംബര കപ്പലില് ലഹരിപ്പാര്ട്ടി നടക്കവേ ആയിരുന്നു അറസ്റ്റ്. ഇവരില് നിന്ന് കൊക്കെയിന്, ഹാഷിഷ, എംഡിഎംഎ തുടങ്ങിയ നിരോധിത മയക്കുമരുന്നുകള് പിടികൂടിയിരുന്നു. സംഭവത്തില് എന്സിബി പ്രത്യേക സംഘം നടത്തിയ അന്വേഷണ റിപ്പോര്ട്ട് രണ്ട് മാസത്തിനകം സമര്പ്പിക്കുമെന്നാണ് സൂചന.
കേസില് അറസ്റ്റിലായ ആര്യന് ഒരുമാസത്തെ ജയില് വാസത്തിന് ശേഷമാണ് ജാമ്യം ലഭിക്കുന്നത്. രാജ്യം വിട്ടു പോകരുത്, പാസ്പോര്ട്ട് കോടതിയില് കെട്ടിവെക്കണം, വെള്ളിയാഴ്ച അന്വേഷണ സംഘത്തിന് മുന്നില് ഹാജരാകണം തുടങ്ങിയ14 ഉപാധികളോടെയാണ് ബോംബെ ഹൈക്കോടതി ആര്യന് അടക്കം മൂന്ന് പ്രതികള്ക്ക് ജാമ്യം അനുവദിച്ചത്.
