പത്തനംതിട്ട: സിപിഎം തിരുവല്ല പെരിങ്ങര ലോക്കല് കമ്മിറ്റി സെക്രട്ടറി സന്ദീപിന്റെ കൊലപാതകക്കേസില് പോലീസ് അറസ്റ്റു ചെയ്തവരെല്ലാം സജീവ സിപിഎം-ഡിവൈഎഫ്ഐക്കാര്. പക്ഷേ ഇക്കാര്യം വ്യക്തമായിട്ടും കൊലക്കുറ്റം ആര്എസ്എസിന്റെ തലയില് കെട്ടിവയ്ക്കാനുള്ള ആസൂത്രിത ശ്രമം തുടരുകയാണ്. ഇതിന്റെ ഭാഗമാണ് ദേശാഭിമാനി കഴിഞ്ഞ ദിവസം നല്കിയ രക്തസാക്ഷികളുടെ പട്ടിക.
2021 ഡിസംബര് രണ്ടിനാണ് ഡിവൈഎഫ്ഐക്കാരും ക്വട്ടേഷന് സംഘാംഗങ്ങളുമായവര് സന്ദീപിനെ കൊലക്കത്തിക്കിരയാക്കിയത്. കൊലപാതകത്തിനു പിന്നില് രാഷ്ട്രീയമല്ല, വ്യക്തി വിരോധമാണെന്ന് അറസ്റ്റിലായവര് പോലീസില് മൊഴി നല്കിയിരുന്നു. സന്ദീപ് വധക്കേസില് അറസ്റ്റിലായവരെല്ലാം സജീവ സിപിഎം പശ്ചാത്തലമുള്ളവരാണ്. ജിഷ്ണു രഘു, പ്രമോദ് പ്രസന്നന്, നന്ദു അജിത്, കാസര്കോട് സ്വദേശി മുഹമ്മദ് മന്സൂര്, വിഷ്ണുകുമാര് എന്നിവരാണ് പ്രതികള്.
ഇവരില് ജിഷ്ണു നേരത്തേ യുവമോര്ച്ചയില് പ്രവര്ത്തിച്ചിരുന്നു എന്നു പറഞ്ഞാണ് കൊലക്കുറ്റം ആര്എസ്എസിനു മേല് സിപിഎം കെട്ടിയേല്പ്പിക്കുന്നത്. എന്നാല്, സംഭവത്തിന് ഒരു വര്ഷം മുമ്പ് യുവമോര്ച്ചയില്നിന്ന് ഇയാളെ പുറത്താക്കിയതാണ്. പിന്നീട് ജിഷ്ണു സിപിഎം പ്രവര്ത്തകനായി. സിപിഎം കുടുംബമാണ് ഇയാളുടേത്. നാലാം പ്രതി മുഹമ്മദ് മന്സൂര് കാസര്കോട് സ്വദേശിയും നിരവധി കേസുകളിലെ പ്രതിയുമാണ്. 2019ല് കാസര്കോട് കുമ്പള പോലീസ് സ്റ്റേഷനില് അടിപിടിക്കേസിലും 2021ല് മഞ്ചേശ്വരത്ത് ബൈക്ക് മോഷണക്കേസിലും പ്രതിയാണ് ഇയാളെന്ന് പോലീസ് പറയുന്നു.
കേസിലെ മറ്റൊരു പ്രതിയായ പായിപ്പാട് സ്വദേശി പ്രമോദ് പ്രസന്നന്റേതും പാര്ട്ടി കുടുംബമാണ്, ഇയാള് ഡിവൈഎഫ്ഐക്കാരനും. നന്ദു അജിത്, വിഷ്ണുകുമാര് എന്നിവര് കൊല്ലപ്പെട്ട സന്ദീപിന്റെ വീടിനടുത്തുതന്നെയുള്ളവരാണ്. ഇവര് ഇരുവരുടെയും കുടുംബം പരമ്പരാഗതമായി സിപിഎം പ്രവര്ത്തകരാണ്. നന്ദു റെഡ് വോളന്റിയറാണ്. ഇത്തരത്തില് സജീവ സിപിഎം പ്രവര്ത്തകരാണ് ലോക്കല് കമ്മിറ്റി സെക്രട്ടറിയുടെ കൊലപാതകക്കേസില് ഉള്പ്പെട്ടിട്ടുള്ളതും പോലീസ് അറസ്റ്റു ചെയ്തതും. എന്നിട്ടും ആര്എസ്എസ് പ്രവര്ത്തകരാണ് കൊലപാതകത്തിനു പിന്നിലെന്നാണ് പാര്ട്ടി പത്രം പ്രചരിപ്പിക്കുന്നത്.
ജന്മഭൂമി ഓണ്ലൈന്