കൊട്ടാരക്കര: വാളകത്ത് പള്ളി കുരിശടിയില്‍ ഉപേക്ഷിച്ച നിലയില്‍ കണ്ടെത്തിയ നവജാതശിശുവിനെ ശിശുക്ഷേമസമിതി ഏറ്റെടുത്തു. ശനിയാഴ്ച വാളകം ബഥനി സ്‌കൂളിന് സമീപത്തുള്ള കുരിശടിയുടെ മുന്നില്‍ നിന്ന് രാത്രി 7.30നാണ് കുഞ്ഞിനെ കണ്ടെത്തിയത്.
വാളകം ക്ഷേത്ര ഉത്സവത്തിന് പോയവരാണ് തുണിയില്‍ പൊതിഞ്ഞ നിലയില്‍ കുഞ്ഞിനെ കുരിശടിയ്‌ക്ക് മുന്നില്‍ കണ്ടത്. ഉടന്‍ തന്നെ പൊലീസിനെ വിവരമറിയിക്കുകയും വാളകം എയിഡ് പോസ്റ്റ് പോലീസ് ഉദ്യോഗസ്ഥര്‍ വാളകത്തെ സ്വകാര്യ ആശുപത്രിയില്‍ എത്തിക്കുകയുമായിരുന്നു. അവകാശികളാരും എത്താത്തതിനെ തുടര്‍ന്ന് ആശുപത്രി അധികൃതരും പോലീസും ശിശുക്ഷേമ സമിതിക്ക് കൈമാറുകയായിരുന്നു.
ജില്ലാ ശിശുക്ഷേമ സമിതി സെക്രട്ടറി കെ ബാലന്‍, വൈസ് പ്രസിഡന്റ് ഷൈന്‍ദേവ് എന്നിവര്‍ ആശുപത്രി അധികൃതരില്‍ നിന്നും കുഞ്ഞിനെ ഏറ്റുവാങ്ങി.
പ്രതികരിക്കാൻ ഇവിടെ എഴുതുക: