കൊച്ചി : ട്വന്റി ട്വന്റി പ്രവര്‍ത്തകനായ ദീപുവിന്റെ സംസ്‌കാര ചടങ്ങുകള്‍ നടത്തിയതില്‍ കോവിഡ് മാനദണ്ഡങ്ങള്‍ പാലിച്ചില്ലെന്ന് ആരോപിച്ച് പാര്‍ട്ടി ചീഫ് കോര്‍ഡിനേറ്റര്‍ സാബു എം. ജേക്കബിനെതിരെ കേസ്. കോവിഡ് പ്രോട്ടോക്കോള്‍ നിലനില്‍ക്കേ ആയിരത്തോളം പേര്‍ സംസ്‌കാര ചടങ്ങുകളില്‍ പങ്കെടുത്തെന്ന് ആരോപിച്ചാണ് നടപടി. ഇവര്‍ക്കെതിരേയും കേസെടുത്തിട്ടുണ്ട്.
സംസ്‌കാര ചടങ്ങുകളില്‍ പങ്കെടുത്ത ആളുകളെ തിരിച്ചറിയുന്ന മുറയ്‌ക്ക് ഇവര്‍ക്ക് നോട്ടീസ് അയയ്‌ക്കുമെന്ന് പോലീസ് പറഞ്ഞു. അതേസമയം ദീപുവിന്റെ മരണം ലിവര്‍ സിറോസിസ് കാരണമാണെന്ന് എംഎല്‍എ പി.വി. ശ്രീനിജനും സിപിഎമ്മും ആവര്‍ത്തിക്കേ പോസ്റ്റുമോര്‍ട്ടം റിപ്പോര്‍ട്ട് പുറത്തുവന്നു. തലയ്‌ക്കേറ്റ ശക്തമായ ക്ഷതം മൂലമാണ് മരണം സംഭവിച്ചതെന്നാണ് റിപ്പോര്‍ട്ടില്‍ പറയുന്നത്.
ദീപുവിന് കരള്‍ രോഗം ഉണ്ടായിരുന്നു. എന്നാല്‍ തലയോട്ടിക്കേറ്റ ശക്തമായ ക്ഷതമാണ് മരണകാരണമെന്നാണ് കോട്ടയം മെഡിക്കല്‍ കോളേജ് ആശുപത്രിയില്‍ നടത്തിയ പോസ്റ്റുമോര്‍ട്ടം റിപ്പോര്‍ട്ട്. ക്ഷതമേറ്റതിനെ തുറന്ന് രക്തധമനികളില്‍ പൊട്ടല്‍ ഉണ്ടായി, കരള്‍ രോഗം ഉണ്ടായിരുന്നതോടെ ആരോഗ്യനില തകരാറിലാക്കിയെന്നും റിപ്പോര്‍ട്ടില്‍ പറയുന്നുണ്ട്.
ട്വന്റി ട്വന്റി സംഘര്‍ഷം നിലനില്‍ക്കുന്ന സാഹചര്യത്തില്‍ പോലീസ് സുരക്ഷയോടൊണ് മൃതദേഹം കിഴക്കമ്പലത്തെത്തിച്ചത്. ദീപുവിനെ അവസാനമായി ഒരു നോക്ക് കാണാന്‍ നൂറ് കണക്കിന് പ്രവര്‍ത്തകരാണ് ഇവിടെ തടിച്ചു കൂടിയത്. കോവിഡ് പോസിറ്റീവായതിനാല്‍ മൃതദേഹം ആംബുലന്‍സില്‍ നിന്ന് പുറത്തിറക്കിയിരുന്നില്ല. മതപരമായ ചടങ്ങുകള്‍ക്ക് ശേഷം കാക്കനാട് അത്താണിയിലെ പൊതുശ്മശനാത്തില്‍ മൃതദേഹം സംസ്‌ക്കരിച്ചു.
കേസില്‍ സിപിഎം പ്രവര്‍ത്തകരായ ബഷീര്‍, സൈനുദ്ദീന്‍, അബ്ദു റഹ്‌മാന്‍, അബ്ദുല്‍ അസീസ് എന്നിവരെ കുന്നത്തുനാട് പൊലീസ് അറസ്റ്റ് ചെയ്തു. നാല് പ്രതികള്‍ക്കെതിരെയും പോലീസ് കൊലക്കുറ്റം ചുമത്തിയിട്ടുണ്ട്. ദീപുവിന്റേത് ആസൂത്രിത കൊലപാതകമെന്നാണ് സാബു എം ജേക്കബ് ആരോപിക്കുന്നത്. സിപിഎമ്മും, കുന്നത്തുനാട് എംഎല്‍എ പി.വി. ശ്രീനിജനുമാണ് കൊലപാതകത്തിന് പിന്നിലെന്നാണ് ട്വന്റി ട്വന്റി ആരോപിക്കുന്നത്.
പ്രതികരിക്കാൻ ഇവിടെ എഴുതുക: