ഹൂസ്റ്റന്‍: കവര്‍ച്ചക്കാരനെ ലക്ഷ്യം വെച്ച വെടിയേറ്റ് ഒന്‍പതു വയസ്സുകാരിക്ക് ദാരുണാന്ത്യം. ട്രക്കില്‍ ഇരിക്കുകയായിരുന്ന പെണ്‍കുട്ടിയാണ് കൊല്ലപ്പെട്ടത്. വെടിവെച്ച ടോണി ഏള്‍സിനെ പോലീസ് അറസ്റ്റു ചെയ്തു. ഹൂസ്റ്റന്‍ വുഡ്റിഡ്ജിലുള്ള ലേയ്‌സ് ബാങ്കിനു മുന്‍വശത്ത് ഫെബ്രുവരി 14 തിങ്കളാഴ്ച രാത്രി 9.30 നായിരുന്നു സംഭവം.
ടോണി ഏള്‍സും ഭാര്യയും ചെയ്‌സ് ബാങ്ക് ഡ്രൈവേയില്‍ പണം വാങ്ങാന്‍ എത്തിയതായിരുന്നു. ഇതിനിടയില്‍ അപരിചതനായ അക്രമി തോക്കുചൂണ്ടി ഇവരില്‍ നിന്നും പണം അപഹരിച്ചു. ഓടി രക്ഷപ്പെടാന്‍ ശ്രമിച്ച അക്രമിക്കെതിരെ ടോണി വാഹനത്തില്‍ നിന്നും ഇറങ്ങി നിറയൊഴിക്കുന്നതിനിടയിലാണ് ഒന്‍പതു വയസ്സുകാരി ഉള്‍പ്പെടുന്ന അല്‍വാറസ് കുടുംബം അവിടെയെത്തിയത്.
വെടിവെക്കുന്ന ശബ്ദം കേട്ടു വാഹനം നിര്‍ത്തിയശേഷം എല്ലാവരേയും പുറത്തിറക്കി. എന്നാല്‍ പിന്നിലെ സീറ്റില്‍ ഇരുന്നിരുന്ന ഒന്‍പതു വയസ്സുകാരി ഇയര്‍ ഫോണിലായിരുന്നു. വാഹനം പെട്ടെന്നു നിര്‍ത്തിയത് കവര്‍ച്ചക്കാരന്റെ സഹായിയാണെന്ന് തെറ്റിദ്ധരിച്ചാണ് ടോണി വെടിവെച്ചത്. മൂന്നു നാലു റൗണ്ടുകള്‍ വെടിയുതിര്‍ത്തിരുന്നു. ഇതിനിടെ യഥാര്‍ഥ കവര്‍ച്ചക്കാരന്‍ രക്ഷപ്പെട്ടു.
വെടിയേറ്റ പെണ്‍കുട്ടിയെ ആശുപത്രിയില്‍ പ്രവേശിപ്പിച്ചുവെങ്കിലും ഇന്ന് മരണം സംഭവിച്ചു. വാലന്റൈയിന്‍ ദിനത്തില്‍ ഭാര്യയും കുട്ടികളുമായി പിസാ കഴിക്കുവാനാണ് അല്‍വാറസ് കുടുംബം ആ വഴി വന്നത്. പോകുന്ന വഴി ബാങ്കില്‍ പണം നിക്ഷേപിക്കുന്നതിന് ബാങ്കിന് മുമ്പില്‍ എത്തിയതായിരുന്നു. രക്ഷപ്പെട്ട കവര്‍ച്ചക്കാരനെ കണ്ടെത്തുന്നതിന് പൊലീസ് പൊതുജനങ്ങളുടെ സഹകരണം അഭ്യര്‍ഥിച്ചു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: