മട്ടാഞ്ചേരി (കൊച്ചി): മലപ്പുറത്തെ പൊന്നാനിയില് നിന്ന് ലക്ഷദ്വീപിലേക്ക് കപ്പല് സര്വീസ്. വിനോദ സഞ്ചാര പഠനയാത്രയുമായി 26നാണ് ആദ്യ കപ്പല്. മാധ്യമപ്രവര്ത്തകരടക്കമുള്ള അന്പതംഗ സംഘമാണ് ഈ യാത്രയിലുള്ളത്. നിലവില് കൊച്ചി, ബേപ്പൂര് എന്നിവിടങ്ങളില് നിന്നാണ് ലക്ഷദ്വീപിലേക്ക് കപ്പല് സര്വീസുള്ളത്.
പൊന്നാനിയില് നിന്ന് ദ്വീപിലെ കവരത്തി, ആന്ത്രോത്ത് ദ്വീപുകളിലേക്ക് യാത്രദൂരം കുറവാണെന്നും സമയലാഭമുണ്ടന്നും ചൂണ്ടിക്കാട്ടിയാണ് പുതിയ സര്വീസിന് നീക്കം. ഇതിനായി പൊന്നാനിയില് ഫ്ളോട്ടിങ്ങ് ജെട്ടി നിര്മിക്കും. ഒപ്പം ഹൈഡ്രോഗ്രാഫിക്ക് സര്വേയും നടത്തും. ലക്ഷദ്വീപ് അഡ്മിനിസ്ട്രേറ്ററുടെ അനുമതിക്കായി ശ്രമം നടത്തും. ആദ്യഘട്ടമായി കോഴിക്കോട് തുറമുഖ ഓഫീസര് അശ്വിന് പ്രതാപ്, പോര്ട്ട് പൈലറ്റ് പ്രതീഷ് ജി. നായര്, ജനപ്രതി നിധികളടക്കമുള്ളവരുമായി ചര്ച്ചകള് നടന്നു. കസ്റ്റംസ് അടക്കമുള്ള കേന്ദ്ര ഏജന്സികളുമായും ചര്ച്ചകള് നടക്കുകയാണ്.
