കൊച്ചി: വെള്ളത്തില് നീന്താനും അല്പ്പം അഭ്യാസങ്ങളൊക്കെ കാണിക്കാനും നീന്തല് വശമുള്ള ആര്ക്കും സാധിക്കും. പുഴയുടെ കയത്തില് മുങ്ങി മത്സ്യബന്ധനം നടത്തുന്നവര് മുതല് എത്രനേരം വേണമെങ്കിലും വെള്ളത്തില് നീന്താന് കഴിയുന്നവരും നമ്മുടെ ഇടയിലുണ്ട്. എന്നാല്, ഒഴുക്കുള്ള വെള്ളത്തില് ബോള് പോലെ പൊങ്ങി കിടക്കുക അത്ര എളുപ്പമല്ല. മാത്രമല്ല, ആ കിടപ്പ് മണിക്കൂറുകളോളം സാധിക്കുക എന്നത് ചിന്തിക്കാന് പോലും സാധിക്കില്ല. എന്നാല് ഇതൊക്കെ നിഷ്പ്രയാസം ചെയ്യുന്ന ഒരു പെണ്കുട്ടിയാണ് കുട്ടനാട്ടിലെ പുളിങ്കുന്ന് സെന്റ് ജോസഫ് ഓര്ഫണേജ് ബാലഭവനില് പഠിച്ച് വളര്ന്ന കണ്ണൂര് സ്വദേശി നിജില.
ഇപ്പോള് കണ്ണൂര് പാണപ്പുഴ വടക്കനിയിലാണ് താമസം. ഇടയ്ക്ക് കുട്ടനാട്ടില് എത്തുമ്പോഴുള്ള പരിശീലനം മാത്രമാണ് നിജിലയുടെ കൈമുതല്. എത്ര ഒഴുക്കുള്ള വെള്ളത്തിലും പൊങ്ങുപോലെ ഉയര്ന്ന് കിടക്കാനുള്ള കഴിവാണ് നിജിലയ്ക്കുള്ളത്. നിലവില് എട്ട് മണിക്കൂര് വരെ ഇവര് വെള്ളത്തില് ഒരേരീതിയില് പൊങ്ങിക്കിടന്നിട്ടുണ്ട്. വെറുതെ വെള്ളത്തില്പൊങ്ങി കിടക്കാനല്ല ഇപ്പോള് നിജില ആലോചിക്കുന്നത്. ഇതില് റെക്കോര്ഡ് ഇടാനാണ് നിജിലയുടെ തീരുമാനം. ഇതിന് വേണ്ടിയുള്ള പരിശീലനങ്ങള് ആരംഭിച്ചു കഴിഞ്ഞു. 27 കാരിയായ നിജില ഇതിനോടകം നിരവധി ചലച്ചിത്രങ്ങളിലും വെബ്സിരീസുകളിലും അഭിനയിച്ചിട്ടുണ്ട്.
