പുല്‍വാമ: ജമ്മു കശ്മീരില്‍ രണ്ട് വ്യത്യസ്ത ഏറ്റുമുട്ടലുകളിലായി ജെയ്‌ഷെ മുഹമ്മദ് കമാന്‍ഡര്‍ സാഹിദ് വാനി ഉള്‍പ്പെടെ അഞ്ച് ഭീകരരെ സൈന്യം വധിച്ചു. പുല്‍വാമ, ബുദ്ഗാം ജില്ലകളിലായി ഇന്നലെ രാവിലെയാണ് ഏറ്റുമുട്ടലുണ്ടായത്. ഭീകരര്‍ ഒളിച്ചിരിക്കുന്നെന്ന രഹസ്യ വിവരത്തെത്തുടര്‍ന്ന് പോലീസും സൈന്യവും നടത്തിയ തെരച്ചിലിനിടെയാണ് ആക്രമണമുണ്ടായത്.
ലഷ്‌കര്‍ ഇ തൊയ്ബ, ജെയ്‌ഷെ മുഹമ്മദ് ഭീകര സംഘടനകളുടെ താവളങ്ങളിലാണ് ഏറ്റുമുട്ടലുണ്ടായത്. പുല്‍വാമയില്‍ നടത്തിയ തെരച്ചിലില്‍ നാല് ഭീകരരും ബുദ്ഗാമില്‍ ഒരു ഭീകരനുമാണ് കൊല്ലപ്പെട്ടത്. ഇവരില്‍ നിന്ന് തോക്കുകള്‍ ഉള്‍പ്പെടെയുള്ള ആയുധ ശേഖരം പിടിച്ചെടുത്തു. ജമ്മു കശ്മീര്‍ പോലീസിന്റെ വലിയ വിജയങ്ങളിലൊന്നാണിതെന്ന് ഐജി വിജയ് കുമാര്‍ പറഞ്ഞു. കഴിഞ്ഞ ഒരു മാസത്തിനിടെ 22 ഭീകരരാണ് വിവിധ ഏറ്റുമുട്ടലുകളിലായി ജമ്മു കശ്മീരില്‍ കൊല്ലപ്പെട്ടത്.
പ്രതികരിക്കാൻ ഇവിടെ എഴുതുക: