പാലാ: മാതാപിതാക്കള് താമസിക്കുന്ന വീട്ടില് മോഷ്ടാവ് കയറിയ വിവരം പാലായിലെ വീട്ടില് സിസി ടിവിയിലൂടെ കണ്ട് സമയോചിതമായി പ്രതികരിക്കുകയും മോഷ്ടാവിനെ പിടികൂടാന് പോലീസിനെ സഹായിക്കുകയും ചെയ്ത സോണിയ മാത്യുവിനെ പാലാ ജനമൈത്രി പോലീസ് ആദരിച്ചു.
പാലാ എസ്എച്ച്ഒ കെ.പി.തോംസണ് സോണിയുടെ പന്തത്തലയയിലെ വീട്ടിലെത്തി മൊമെന്റോ കൈമാറി. സോണിയയുടെ കുടുംബാംഗങ്ങള്ക്കൊപ്പം ജനമൈത്രി പോലീസ് അംഗങ്ങളും ചടങ്ങില് പങ്കെടുത്തു. എസ്ഐ ഷാജി സെബാസ്റ്റ്യന്,സിപിഒ അരുണ്കുമാര്, വനിത സിപിഒ ബിനുമോള് എന്നിവര് ഒപ്പമുണ്ടായിരുന്നു. വിമുക്ത ഭടനായ കീഴൂര് മേച്ചേരില് മാത്യുവും ഭാര്യയും താമസിക്കുന്ന വീട്ടില് കഴിഞ്ഞ ബുധനാഴ്ച രാത്രിയാണ് മോഷ്ടാവ് കയറിയത്.
മകള് കിടക്കാന് നേരത്ത് മൊബൈല് ഫോണ് നോക്കിയപ്പോഴാണ് കടുത്തുരുത്തി കീഴൂര് വീട്ടിലെ സിസി ടിവി ദൃശ്യങ്ങളില് മോഷ്ടാവിനെ കണ്ടത്. വിവരം ഉടന് അയല്വാസിയെയും അവര് പോലീസിലും അറിയിച്ചതോടെ വെള്ളൂര് പോലീസാണ് സ്ഥലത്തെത്തി മോഷ്ടാവ് ആലപ്പുഴ ചിറ്റേത്ത് പുത്തന്പുരയില് റോബിന്സണ്(32)നെ പിടികൂടിയത്.
