രാജ്യത്ത് കോവിഡ് കേസുകള്‍ വര്‍ധിക്കുന്നതിന്റെ സാഹചര്യത്തില്‍ അജിത്ത് കുമാര്‍ നായകനായ തമിഴ് സിനിമ ‘വലിമൈ’യുടെ റിലീസ് നീട്ടിവച്ചു. ചിത്രത്തിന്റെ അണിയറ പ്രവര്‍ത്തകരാണ് ഇക്കാര്യം സോഷ്യല്‍ മീഡിയയിലൂടെ അറിയിച്ചത്.
തമിഴ്‌നാട്ടില്‍ കഴിഞ്ഞ ദിവസം കോവിഡ് നിയന്ത്രണങ്ങള്‍ കടുപ്പിച്ചതിനു പിന്നാലെയാണ് വലിമൈ റിലീസ് മാറ്റിയത്. ഈ മാസം 13ന് റിലീസ് ചെയ്യാന്‍ ഇരിക്കവെയാണ് പുതിയ തീരുമാനവുമായി അണിയറ പ്രവര്‍ത്തകര്‍ എത്തിയത്. രണ്ടര വര്‍ഷത്തെ ഇടവേളയ്‌ക്കു ശേഷമെത്തുന്ന അജിത്ത് കുമാര്‍ ചിത്രം എന്ന നിലയ്‌ക്ക് ആരാധകരില്‍ വലിയ കാത്തിരിപ്പുണ്ടാക്കിയ ചിത്രമായിരുന്നു വലിമൈ. കോവിഡ് കാലത്ത് ചിത്രത്തിന്റെ പുതിയ അപ്‌ഡേറ്റുകള്‍ക്കായി അജിത്ത് ആരാധകര്‍ ട്വിറ്ററിലും പുറത്തും ക്യാംപെയ്ന്‍ പോലും നടത്തിയിരുന്നു.
ആരാധകരുടെ തിയറ്റര്‍ അനുഭവത്തിനായി തങ്ങളും കാത്തിരിപ്പിലായിരുന്നെന്നും എന്നാല്‍ കോവിഡ് കേസുകള്‍ വര്‍ധിക്കുന്ന സാഹചര്യത്തില്‍ അവരുടെതന്നെ സുരക്ഷയെ കരുതി റിലീസ് നീട്ടാനാണ് തീരുമാനിച്ചിരിക്കുന്നതെന്നും വലിമൈ ടീം പുറത്തിറക്കിയ കുറിപ്പില്‍ പറയുന്നു. സാഹചര്യം സാധാരണ നിലയില്‍ എത്തിയതിനു ശേഷമാവും പുതിയ റിലീസ് തീയതി പ്രഖ്യാപിക്കുക. ബോളിവുഡ് ചിത്രങ്ങളായ ഷാഹിദ് കപൂര്‍ നായകനായ ജേഴ്‌സി, അക്ഷയ് കുമാറിന്റെ സൂര്യവന്‍ശി, തെലുങ്കില്‍ നിന്ന് രാജമൗലിയുടെ ആര്‍ആര്‍ആര്‍, പ്രഭാസിന്റെ ബഹുഭാഷാ ചിത്രം രാധെ ശ്യാം എന്നിവയാണ് ഇതിനു മുന്‍പ് റിലീസ് മാറ്റിവച്ച പ്രധാന ചിത്രങ്ങള്‍.
പ്രതികരിക്കാൻ ഇവിടെ എഴുതുക: