കോഴിക്കോട് : വഖഫിന്റെ കെട്ടിടം പൊളിച്ചു നീക്കാന്‍ ഉത്തരവുമായി കോഴിക്കോട് ജില്ലാ കളക്ടര്‍. കോഴിക്കോട് കോര്‍ട്ട് റോഡ് സെന്‍ട്രല്‍ മാര്‍ക്കറ്റിന് സമീപത്തായി പുതിയറ മാളിയേക്കല്‍ മമ്മു ഹാജി വക വഖഫിന്റെ കെട്ടിടം പൊളിച്ചു നീക്കാനാണ് ജില്ലാ കളക്ടര്‍ ഡോ. നരസിംഹഗുരി ഗുഡി ഉത്തരവിറക്കിയിരിക്കുന്നത്.
കെട്ടിടവുമായി ബന്ധപ്പെട്ട് നിലവില്‍ കേസുണ്ട്. ഇത്കൂടാതെ കെട്ടിടത്തിന്റെ അപകടാവസ്ഥ കൂടി പരിഗണിച്ചാണ് കളക്ടറുടെ നടപടി. കെട്ടിടത്തിന്റെ ഒരു ഭാഗം ഇതിനോടകം തന്നെ തകര്‍ന്ന് വീണിരുന്നു. ഇതിന് പിന്നാലെയാണ് കെട്ടിടം പൊളിച്ച് മാറ്റാന്‍ കളക്ടര്‍ തീരുമാനിച്ചത്.
ഈ സാഹചര്യത്തിലാണ് അടിയന്തിരമായി കെട്ടിടം പൊളിച്ചുമാറ്റി കോടതിയില്‍ റിപ്പോര്‍ട്ട് നല്‍കണമെന്ന് കളക്ടര്‍ കോര്‍പ്പറേഷന് നിര്‍ദേശം നല്‍കിയത്. കെട്ടിടത്തില്‍ നിന്നുള്ള വരുമാനം കുടുംബത്തിലെ അംഗങ്ങള്‍ക്ക് വരുമാനമാകും എന്ന ഉദ്ദേശത്തോടെയായിരുന്നു കെട്ടിടം വഖഫ് ചെയ്തത്. പ്രസ്തുത കെട്ടിടത്തില്‍ വര്‍ഷങ്ങളായി കെടിസി പ്രിന്റിങ് പ്രസ് പ്രവര്‍ത്തിക്കുന്നുണ്ട്. എന്നാല്‍ പ്രസ് ഒഴിയാന്‍ തയ്യാറാവുന്നില്ലെന്ന് ഹാജിയുടെ കുടുംബം പരാതിപ്പെട്ടു.
പ്രസിനെ ഒഴിപ്പിക്കുന്നതുമായി ബന്ധപ്പെട്ട് വഖഫ് ബോര്‍ഡില്‍ നിന്ന് അനുകൂല വിധിയുണ്ടായിരുന്നെങ്കിലും വാടകക്കാര്‍ ട്രൈബൂണലിനെ സമീപിക്കുകയും പിന്നീട് കേസ് ഹൈക്കോടതിയില്‍ എത്തുകയുമായിരുന്നു.
പ്രതികരിക്കാൻ ഇവിടെ എഴുതുക: