അബുദാബി: ജീവിതാവസാനം വരെ എത്ര അധ്വാനിച്ചാലും ലഭിക്കാത്ത തുകയാണ് മലപ്പുറം സ്വദേശി ഹരിദാസിനെ കാത്തിരിക്കുന്നത്. ഈ ഭാഗ്യം ആകട്ടെ കൊടുങ്ങല്ലൂര് ഭഗവതി നല്കിയ അനുഗ്രഹവും പുണ്യവുമെന്ന് പറയുന്നു തിരൂര് കടുങ്ങാക്കുണ്ട് വരസനാല് മുക്കിലപീടിക ചെറവല്ലൂര് സ്വദേശി മൂത്താട്ട് വാസുണ്ണിയുടെ മകന് ഹരിദാസന്.
ബിഗ് ടിക്കറ്റ് നറുക്കെടുപ്പില് 50.66 കോടി രൂപയാണ് (2.5 കോടി ദിര്ഹം) ശിവദാസിന്റെ പേരില് 15 പേര് ചേര്ന്നെടുത്ത ടിക്കറ്റിന് ലഭിച്ചത്. ഹരിദാസനും മറ്റു 12 മലയാളികളും ഒരു ഉത്തര്പ്രദേശ് സ്വദേശിയും ഒരു പാക്കിസ്ഥാനിയും ചേര്ന്നാണ് ടിക്കറ്റെടുത്തത്. അല്ഐനില് ഫയര് അലാറം, ഫയര് ഫൈറ്റിങ് സൂപ്പര്വൈസറായി ജോലി ചെയ്തുവരികയാണ് ഹരിദാസ്.
അമ്മേ രക്ഷിക്കണേ എന്നും സമ്മാനം ലഭിച്ചാല് തന്റെ 8 സെന്റ് ഭൂമി നല്കാമെന്നും വാഗ്ദാനം ചെയ്താണ് ടിക്കറ്റെടുത്തതെന്നും വാക്കു പാലിക്കുമെന്നും ഹരിദാസന് മലയാള മാധ്യമത്തോട് പറഞ്ഞു. ജീവിതത്തില് എത്ര അധ്വാനിച്ചാലും ഇത്ര തുക കിട്ടില്ല. സമ്മാനത്തുക എന്തുചെയ്യണമെന്ന് പിന്നീട് തീരുമാനിക്കുമെന്നും പറഞ്ഞു.
2008 മുതല് യുഎഇയിലുള്ള ഹരിദാസന് കൂട്ടുകാര്ക്കൊപ്പം ചേര്ന്നു പതിവായി ടിക്കെറ്റെടുക്കാറുണ്ടെന്നും സൂചിപ്പിച്ചു. അമ്മ ശോഭന, ഭാര്യ ശില്പ, മകന് അഭിനവ് എന്നിവരടങ്ങുന്നതാണ് കുടുംബം. രണ്ടാം സമ്മാനമായ 20 ലക്ഷം ദിര്ഹം (നാലു കോടി രൂപ) ഇന്ത്യക്കാരനായ അശ്വിന് അരവിന്ദാക്ഷനാണ് ലഭിച്ചത്.
