കോട്ടയം: ജനുവരി ഒന്ന്, രണ്ട് തീയതികളിൽ നടക്കേണ്ട 145-ാമത് മന്നം ജയന്തി സമ്മേളനങ്ങളും ആഘോഷങ്ങളും കൊവിഡ് പശ്ചാത്തലത്തിൽ വേണ്ടെന്നുവച്ച്, ജനുവരി രണ്ടിന് സംസ്ഥാനവ്യാപകമായി മന്നംജയന്തി ആചരിക്കുമെന്ന് എൻഎസ്എസ് ജനറൽ സെക്രട്ടറി ജി. സുകുമാരൻ നായർ അറിയിച്ചു.
താലൂക്ക് യൂണിയനുകളിലും കരയോഗങ്ങളിലും രാവിലെ 11ന് സമുദായാചാര്യന്റെ ചിത്രത്തിന് മുമ്പിൽ നിലവിളക്കു കൊളുത്തി, പുഷ്പാർച്ചന നടത്തും. പെരുന്നയിലെ മന്നംസമാധിമണ്ഡപത്തിൽ മുൻപതിവുപോലെ, രാവിലെ 7.30 മുതൽ പുഷ്പാർച്ചന ആരംഭിക്കും. കൊവിഡ് മാനദണ്ഡം പാലിച്ച് സമുദായാംഗങ്ങൾക്കും മറ്റ് അഭ്യുദയകാംക്ഷികൾക്കും അതിൽ പങ്കെടുക്കാം.
സമുദായാചാര്യന്റെ ഓരോ ജന്മദിനവും നായർ സർവീസ് സൊസൈറ്റിയുടെ വളർച്ചയിലേക്കുള്ള പടവുകളാണ്. നായർ സമുദായത്തിന്റെയും സർവീസ് സൊസൈറ്റിയുടെയും പുരോഗതിക്കു വേണ്ടിയുള്ള പ്രവർത്തന ങ്ങളോടൊപ്പം, സാമൂഹിക അസമത്വങ്ങൾക്കെതിരെ പോരാടുകയും രാജ്യ ത്തിന്റെ സർവ്വതോമുഖമായ പുരോഗതിക്കു വേണ്ടി ജീവിതാവസാനംവരെ അക്ഷീണം പരിശ്രമിക്കുകയുംചെയ്ത ആ ധന്യമായ ജീവിതത്തെയും പ്രവർത്തനങ്ങളെയും ആദരപൂർവ്വം സ്മരിക്കാനുള്ള അവസരമാണ് ഓരോ മന്നംജയന്തിയുമെന്നും സുകുമാരൻ നായർ പറഞ്ഞു.
