തിരുവനന്തപുരം : കോവിഡിന്റെ പുതിയ വകഭേദമായ ഒമിക്രോണ് വ്യാപനത്തിന്റെ അടിസ്ഥാനത്തില് ബൂസ്റ്റര് ഡോസ് ആദ്യത്തേതില് നിന്നും വ്യത്യസ്ത വാക്സിന് ആയിരിക്കുമെന്ന് റിപ്പോര്ട്ടുകള്. രാജ്യത്ത് ബൂസ്റ്റര് ഡോസുകള് നല്കുമെന്ന് പ്രധാനമന്ത്രി നരേന്ദ്രമോദി കഴിഞ്ഞ ദിവസം പ്രഖ്യാപിച്ചിരുന്നു. അതിനു പിന്നാലെ ദേശീയ മാധ്യമങ്ങളാണ് ഇതുസംബന്ധിച്ച റിപ്പോര്ട്ട് പുറത്തുവിട്ടിരിക്കുന്നത്.
നിലിവില് ആദ്യ രണ്ട് ഡോസുകളും ഒരേ വാക്സിന് തന്നെയാണ് നല്കുന്നത്. എന്നാല് ഇതില് നിന്ന് വ്യത്യസ്തമായ മറ്റൊരു വാക്സിനാകും ബൂസ്റ്റര് ഡോസായി വിതരണം ചെയ്യുക. ഇത് സംബന്ധിച്ചുള്ള മാര്ഗനിര്ദ്ദേശം കേന്ദ്ര ആരോഗ്യ മന്ത്രാലയം പുറത്തിറക്കുമെന്നാണ് സൂചന. കോവിഡ് വാക്സിന് വിതരണത്തിന്റെ ആദ്യഘട്ടം പോലെ ആരോഗ്യപ്രവര്ത്തകര്ക്കും കോവിഡ് മുന്നണി പോരാളികള്ക്കും ഒപ്പം ഗുരുതര ആരോഗ്യ പ്രശ്നങ്ങളുള്ള 60 വയസ്സ് പിന്നിട്ടവര്ക്കുമാണ് ബൂസ്റ്റര് ഡോസ് തുടക്കത്തില് നല്കുകയെന്ന് പ്രധാനമന്ത്രി വ്യക്തമാക്കിയിട്ടുണ്ട്.
ഒമിക്രോണ് രോഗികളുടെ എണ്ണം വര്ധിക്കുന്നതില് ആശങ്ക വേണ്ടെന്നും പ്രതിരോധ പ്രവര്ത്തനങ്ങള് ശക്തമാക്കുകയാണ് വേണ്ടതെന്നും രാജ്യത്തെ അഭിസംബോധന ചെയ്യവേ പ്രധാനമന്ത്രി നരേന്ദ്ര മോദി അറിയിച്ചത്. രാജ്യത്ത് ഒമിക്രോണ് കേസുകള് ക്രമേണ വര്ധിക്കുകയാണെന്നും ഇന്ത്യയില് 2022 ജനുവരി അവസാനത്തോടെ കേസുകള് വലിയ രീതിയില് വര്ധിക്കുമെന്നുമാണ് ആരോഗ്യ മേഖലയിലെ വിദഗ്ധര് പറഞ്ഞിരുന്നത്.
അതേസമയം ഇന്ത്യയില് ഒമിക്രോണ് സ്ഥിരീകരിച്ചവരുടെ എണ്ണം 422 ആയി. മഹാരാഷ്ട്രയിലാണ് ഏറ്റവും കൂടുതല് ഒമിക്രോണ് രോഗികളുള്ളത്. സംസ്ഥാനത്ത് 108 പേര്ക്ക് ഒമിക്രോണ് സ്ഥിരീകരിച്ചു. തൊട്ടുപിന്നിലുള്ള ഡല്ഹിയില് 79 ആണ് രോഗികളുടെ എണ്ണം. ഗുജറാത്തില് 43, തെലങ്കാന 41, കേരളത്തില് 38 എന്നിങ്ങനെയാണ് ഒമിക്രോണ് കേസുകളുടെ എണ്ണം.
