കോഴിക്കോട്: കെറെയില്‍ വിരുദ്ധ സമരത്തെ ഒറ്റുകൊടുക്കുന്ന നിലപാടാണ് യുഡിഎഫും കോണ്‍ഗ്രസും സ്വീകരിക്കുന്നതെന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍. ശശി തരൂരിന്റെ നിലപാട് ഇത് വ്യക്തമാക്കുന്നതാണ്. കെറെയിലിനെതിരായ നിവേദനത്തില്‍ ഒപ്പുവെക്കാതിരിക്കുകയും പരസ്യമായി കെറെയിലിനെയും മുഖ്യമന്ത്രി പിണറായി വിജയനെയും പ്രശംസിക്കുകയും ചെയ്ത സ്വന്തം എംപിക്കെതിരെ എന്ത് നടപടിയാണ് കെ.സുധാകരനും വിഡി സതീശനും സ്വീകരിച്ചതെന്നും സുരേന്ദ്രന്‍ ആരാഞ്ഞു.
വീടും കുടിയും കിടപ്പാടവും നഷ്ടമാവുന്ന പാവങ്ങളെ പിന്നില്‍ നിന്നും കുത്തുന്ന നിലപാടാണ് യുഡിഎഫ് നേതൃത്വം സ്വീകരിക്കുന്നത്. ജനങ്ങളുടെ കണ്ണില്‍പൊടിയിടാനുള്ള സമരം നിര്‍ത്തുന്നതാണ് കോണ്‍ഗ്രസ് നേതൃത്വത്തിന് നല്ലത്. പിണറായി വിജയന്‍ സര്‍ക്കാരിന്റെ ബിടീമായാണ് എല്ലാ കാര്യത്തിലും വിഡി സതീശനും സംഘവും പ്രവര്‍ത്തിക്കുന്നതെന്നും സുരേന്ദ്രന്‍ പ്രസ്താവനയില്‍ ആരോപിച്ചു.
കോണ്‍ഗ്രസ് സിപിഎം അവിശുദ്ധ കൂട്ടുകെട്ടിനെതിരെ ബിജെപി ശക്തമായ പ്രതിഷേധം സംഘടിപ്പിക്കും. കെറെയില്‍ വിരുദ്ധ സമരത്തില്‍ കേരളത്തിലെ ജനങ്ങള്‍ക്കൊപ്പം അവസാനം വരെ ബിജെപി പോരാടുമെന്നും സുരേന്ദ്രന്‍ പറഞ്ഞു.
പ്രതികരിക്കാൻ ഇവിടെ എഴുതുക: