തിരുവനന്തപുരം: രാജ്യത്തെ ഏറ്റവും വലിയ ഷോപ്പിംഗ് മാളുകളിലൊന്നായി തിരുവനന്തപുരം ലുലു മാള്‍. ആക്കുളത്തുള്ള മാളില്‍ നടന്ന ചടങ്ങില്‍ മുഖ്യമന്ത്രി പിണറായി വിജയന്‍ ഉദ്ഘാടനം നിര്‍വ്വഹിച്ചു.
1971ലെ ഇന്ത്യ – പാക് യുദ്ധ വിജയവും ധീര സൈനികരെയും സ്മരിച്ച് ഒരു നിമിഷത്തെ മൗനാചരണത്തോടെയാണ് മാളിന്റെ ഉദ്ഘാടന ചടങ്ങുകള്‍ ആരംഭിച്ചത്.
പ്രതിപക്ഷ നേതാവ് വി.ഡി. സതീശന്‍ അധ്യക്ഷത വഹിച്ച ചടങ്ങില്‍, ഭക്ഷ്യവകുപ്പ് മന്ത്രി ജി ആര്‍ അനില്‍, എം പിമാരായ ശശി തരൂര്‍ ജോസ് കെ മാണി, പ്രതിപക്ഷ ഉപനേതാവ് പി.കെ.കുഞ്ഞാലിക്കുട്ടി, ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍, സിനിമാ താരം മമ്മൂട്ടി,ഉമ്മന്‍ ചാണ്ടി, രമേശ് ചെന്നിത്തല എംഎല്‍എ, കടകംപളളി സുരേന്ദ്രന്‍ , യു എ ഇ വിദേശവ്യാപാര മന്ത്രി ഡോ. താനി അഹമ്മദ് അല്‍ സെയ്ദി മുഖ്യാതിഥിയും , ഇന്ത്യയിലെ യു എ ഇ അംബാസഡര്‍ ഡോ. അഹമ്മദ് അബ്ദുള്‍ റഹ്മാന്‍ അല്‍ബന്ന തുടങ്ങി പ്രമുഖര്‍ പങ്കെടുത്തു.
കേരളത്തിന്റെ ഷോപ്പിംഗ് അനുഭവം ഒരു കുടക്കീഴിലാക്കുന്ന തലസ്ഥാനത്തെ ലുലു മാള്‍ വെള്ളിയാഴ്ച രാവിലെ 9 മണി മുതല്‍ പൊതുജനങ്ങള്‍ക്കായി തുറന്ന് കൊടുക്കും.
ഇന്ത്യയിലെ തന്നെ ഏറ്റവും വലുപ്പമേറിയ ഷോപ്പിംഗ് മാളുകളിലൊന്നാണ് തലസ്ഥാനത്തെ ലുലു മാള്‍. രണ്ടായിരംകോടി രൂപ നിക്ഷേപത്തില്‍ഏകദേശം ഇരുപത് ലക്ഷത്തോളം ചതുരശ്രയടി വിസ്തീര്‍ണ്ണത്തിലാണ്‌ടെക്‌നോപാര്‍ക്കിന് സമീപം ആക്കുളത്ത് മാള്‍ പണികഴിപ്പിച്ചിരിക്കുന്നത്.
2 ലക്ഷം ചതുരശ്രയടി വിസ്തീര്‍ണ്ണത്തിലുള്ള ലുലു ഹൈപ്പര്‍മാര്‍ക്കറ്റാണ് മാളിന്റെ മുഖ്യ ആകര്‍ഷണം. ഇതോടൊപ്പം ടെക്‌നോളജി ട്രെന്‍ഡുകളുമായി ലുലു കണക്ട്, ഫാഷന്‍ ലോകത്തെ തുടിപ്പുകള്‍ അണിനിരത്തുന്ന ലുലു ഫാഷന്‍ സ്‌റ്റോര്‍, മലയാളികളുടെ വെഡ്ഡിംഗ് ഡെസ്റ്റിനേഷനായി മാറുന്ന ലുലു സെലിബ്രേറ്റ് എന്നിവയടക്കം ഷോപ്പിംഗിന് തികച്ചും പുത്തന്‍ അനുഭവം നല്‍കുന്നതാണ് മാള്‍. 200ല്‍ പരം രാജ്യാന്തര ബ്രാന്‍ഡുകളാണ് ലുലു മാളിലെ ഷോപ്പുകളില്‍ ഉപഭോക്താക്കളെ കാത്തിരിക്കുഇവക്കു എല്ലാം പുറമെ ഖാദി ഉല്‍പന്നങ്ങളുടെ വന്‍ ശേഖരവുമുണ്ട്.
ഒരേ സമയം 2,500പേര്‍ക്ക് ഇരുന്ന് ഭക്ഷണം കഴിക്കാന്‍ ആകുന്ന ഫുഡ് കോര്‍ട്ട് മാളിന്റെ മറ്റൊരു പ്രധാന ആകര്‍ഷണമാണ്. കുട്ടികള്‍ക്ക് വിനോദത്തിന്റെ ഇതുവരെ കാണാത്ത ലോകമൊരുക്കി ഫണ്‍ട്യൂറ എന്ന ഏറ്റവും വലിയ എന്റര്‍ടെയിന്മെന്റ് സെന്ററും മാളിലുണ്ട്.
അത്യാധുനിക മികവോടെ 12 സ്‌ക്രീന്‍ സൂപ്പര്‍ പ്ലക്‌സ് തീയേറ്ററും മാളില്‍ സജ്ജമാകുന്നുണ്ട്.വിശാലമായ പാര്‍ക്കിംഗ് സംവിധാനം മാളിലെത്തുന്ന ഉപഭോക്താക്കള്‍ക്ക് സുരക്ഷിതവും ബുദ്ധിമുട്ടില്ലാത്തതുമായ വാഹന പാര്‍ക്കിംഗ് ഉറപ്പ് തരുന്നു. ഇരുചക്ര വാഹനങ്ങള്‍ ഉള്‍പ്പെടെ 3,500 ലധികം വാഹനങ്ങള്‍ക്ക് പാര്‍ക്ക് ചെയ്യാവുന്ന എട്ട് നിലകളിലായുള്ള മള്‍ട്ടിലെവല്‍ പാര്‍ക്കിംഗ് സംവിധാനമാണ് മാളിലുള്ളത്
വികസനത്തിനായി കേരളത്തിന് വേണ്ടി തന്റെ പരമാവധി ശേഷി വിനിയോഗിക്കുന്ന വ്യവസായിയാണ് എം എ യൂസഫലിയെന്ന് മുഖ്യമന്ത്രി പിണറായി വിജയന്‍. ദ്രോഹ മനസ്ഥിതിയുള്ള ആളുകള്‍ വികസന പദ്ധതികള്‍ക്ക് തടസ്സം നില്‍ക്കുന്നതിനെ അദ്ദേഹം വിമര്‍ശിച്ചു. ഇത് നാട് തിരിച്ചറിയണമെന്നും മുഖ്യമന്ത്രി പറഞ്ഞു
തലസ്ഥാനത്ത് മഹാവിസ്മയം തീര്‍ത്ത ലുലു ഗ്രൂപ്പിനെ അഭിനന്ദിച്ച വി ഡി സതീശന്‍ കേരളത്തെ സ്‌നേഹിക്കുന്ന വ്യവസായിയാണ് യൂസഫലിയെന്ന് പറഞ്ഞു. കേരളത്തിലെ മറ്റൊരു സ്വപ്ന പദ്ധതി യാഥാര്‍ത്ഥ്യമാക്കിയതില്‍ ഏറെ സന്തോഷവും അഭിമാനവുമുണ്ടെന്ന് എം എ യൂസഫലി സ്വാഗത പ്രസംഗത്തില്‍ പറഞ്ഞു. കേരളം നിക്ഷേപ സൗഹൃദ സംസ്ഥാനമാണ്. ഇതിനായി എല്ലാവിധ പിന്തുണയും പിണറായി വിജയന്റെ നേതൃത്വത്തിലുള്ള സര്‍ക്കാര്‍ നല്‍കുന്നുണ്ട്. സംസ്ഥാനത്ത് കൂടുതല്‍ പദ്ധതികള്‍ കൊണ്ടുവരുന്നതിലൂടെ കൂടുതല്‍ പേര്‍ക്ക് തൊഴില്‍ നല്‍കാനാകും. തിരുവനന്തപുരത്തെ ലുലു മാളില്‍ നേരിട്ടും അല്ലാതെയും പതിനായിരത്തിലധികം പേര്‍ക്കാണ് ജോലി നല്‍കിയതെന്നും അദ്ദേഹം കൂട്ടിച്ചേര്‍ത്തു. യൂസഫലിയുടേത് വിലമതിക്കാനാവാത്ത സേവനങ്ങളെന്ന് കേന്ദ്രമന്ത്രി വി മുരളീധരന്‍ വീഡിയോ സന്ദേശത്തില്‍ പറഞ്ഞു.
വ്യവസായ തൊഴില്‍ സംരംഭങ്ങളില്‍ ബിഗ് ബ്രാന്‍ഡായി യൂസഫലി തുടരട്ടെയെന്ന് മമ്മൂട്ടി ആശംസിച്ചു.
ലുലു മാള്‍ പരിസ്ഥിതി സൗഹൃദമായ നിര്‍മ്മാണം ഉറപ്പുവരുത്തിയതിന് ഇന്ത്യന്‍ ഗ്രീന്‍ ബില്‍ഡിങ് കൗണ്‍സില്‍ നല്‍കിയ ഗോള്‍ഡ് സര്‍ട്ടിഫിക്കറ്റ് ചടങ്ങില്‍ ലുലു ഗ്രൂപ്പിന് കൈമാറി. കൗണ്‍സില്‍ ചെയര്‍മാന്‍ വി സുരേഷ് ആണ് സര്‍ട്ടിഫിക്കറ്റ് കൈമാറിയത്.
പ്രതികരിക്കാൻ ഇവിടെ എഴുതുക: