ന്യൂദല്‍ഹി: എസ്എന്‍ഡിപിയെയും എസ്എന്‍ ട്രസ്റ്റിനെയും കൂടുതല്‍ ഉയരങ്ങളിലേക്ക് നയിച്ച പ്രതിഭാശാലിയാണ് വെള്ളാപ്പള്ളി നടേശനെന്ന് കേന്ദ്രമന്ത്രി രാജീവ് ചന്ദ്രശേഖര്‍. എസ്എന്‍ഡിപി യോഗം ജനറല്‍ സെക്രട്ടറി പദവിയില്‍ രജതജൂബിലി ആഘോഷിക്കുന്ന വെള്ളാപ്പള്ളി നടേശന് അയച്ച ആശംസാ സന്ദേശത്തില്‍ മന്ത്രി പറഞ്ഞു.
സംഘടനയ്‌ക്ക് കീഴിലെ യൂണിയനുകളും വിദ്യാഭ്യാസ സ്ഥാപനങ്ങളും മറ്റു പോഷക സംഘടനകളുമെല്ലാം വെള്ളാപ്പള്ളി നടേശന്റെ നേതൃത്വത്തിന് കീഴില്‍ കൂടുതല്‍ വളര്‍ച്ച കൈവരിച്ചു. ട്രസ്റ്റിന് കീഴിലുള്ള വിദ്യാഭ്യാസ സ്ഥാപനങ്ങള്‍ കേരളത്തിന്റെ വിദ്യാഭ്യാസ സാമൂഹ്യ സാഹചര്യങ്ങളിലെ വന്‍മുന്നേറ്റത്തിന് കാരണമായി. എസ്എന്‍ഡിപിയുടെയും എസ്എന്‍ ട്രസ്റ്റിന്റെയും അമരത്ത് സില്‍വര്‍ ജൂബിലി തികയ്‌ക്കുന്ന വെള്ളാപ്പള്ളി നടേശന് എല്ലാവിധ ആശംസകളും അഭിനന്ദനങ്ങളും അറിയിക്കുന്നു.
ട്രസ്റ്റിന് കീഴില്‍ ആരംഭിക്കുന്ന സിവില്‍ സര്‍വ്വീസ് ട്രെയിനിങ് ഇന്‍സ്റ്റിറ്റിയൂട്ട് എന്ന പുതിയ സംരംഭം വിദ്യകൊണ്ട് പ്രബുദ്ധരാകാന്‍ ആഹ്വാനം ചെയ്ത മഹാഗുരു ശ്രീനാരായണ ഗുരുദേവന്‍ കണ്ട സ്വപ്നങ്ങളുടെ തുടര്‍ച്ചയായാണ് തനിക്ക് അനുഭവപ്പെടുന്നത്. സ്വാതന്ത്ര്യത്തിന് മുമ്പും ശേഷവും നിരവധി മികച്ച സിവില്‍ സര്‍വ്വീസ് ഉദ്യോഗസ്ഥരെ കേരളം സംഭാവന ചെയ്തിട്ടുണ്ട്. വിദ്യാര്‍ഥികളില്‍ ധാര്‍മ്മികതയും മൂല്യങ്ങളും നിറയ്‌ക്കാന്‍ ഉതകുന്ന തരത്തിലാകട്ടെ ഇന്‍സ്റ്റിറ്റിയൂട്ടിന്റെ പ്രവര്‍ത്തനമെന്നും രാജീവ് ചന്ദ്രശേഖര്‍ ആശംസാ സന്ദേശത്തില്‍ പറഞ്ഞു.
പ്രതികരിക്കാൻ ഇവിടെ എഴുതുക: