കൊച്ചി: സന്തോഷ് ട്രോഫി ഫുട്ബോള് ദക്ഷിണ മേഖലാ യോഗ്യതാ റൗണ്ടിലെ ആദ്യ മത്സരത്തില് ലക്ഷദ്വീപിനെതിരെ കേരളത്തിന് തകര്പ്പന് ജയം. ലക്ഷദ്വീപിനെതിരെ എതിരില്ലാത്ത അഞ്ച് ഗോളുകള്ക്കാണ് കേരളത്തിന്റെ ജയം. നിജോ ഗില്ബര്ട്ട്, ജെസിന്, രാജേഷ് എസ്, അര്ജുന് ജയരാജ് എന്നിവര് കേരളത്തിന് വേണ്ടി സ്കോര് ചെയ്തപ്പോള് ലക്ഷദ്വീപ് താരം തന്വീറിന്റെ സെല്ഫ് ഗോളും കേരളത്തിന് നേട്ടമായി.
ഉബൈദുള്ള ചുവപ്പുകാര്ഡ് കണ്ട് പുറത്തായതും ലക്ഷദ്വീപിന് പ്രഹരമായി. ആദ്യ പകുതിയില് കേരളം 3-0 ന് ലീഡ് നേടിയിരുന്നു.
മത്സരം തുടങ്ങി നാലാം മിനിട്ടില് തന്നെ കേരളം സ്കോര് ചെയ്തു. നാലാം മിനിട്ടില് ലഭിച്ച പെനാല്ട്ടി ലക്ഷ്യത്തിലെത്തിച്ച് നിജോ ഗില്ബര്ട്ടാണ് കേരളത്തിന് ലീഡ് സമ്മാനിച്ചത്. പിന്നാലെ 12ാം മിനിട്ടില് ജെസിന് കേരളത്തിന്റെ ലീഡ് രണ്ടാക്കി ഉയര്ത്തി. മികച്ച ഫിനിഷിലൂടെയാണ് ജെസിന് വലകുലുക്കിയത്.
