തൃശ്ശൂര്‍: ഏറെനാളത്തെ കാത്തിരിപ്പിനൊടുവില്‍ ഇന്ത്യന്‍ പൗരത്വം കൈപ്പറ്റിയതിന്റെ സന്തോഷത്തിലാണ് ഷഫീനയും മുഹമ്മദ് റയ്ഹാനും. അമ്മ ഷാമിലയ്‌ക്കൊപ്പം കളക്ട്രേറ്റിലെത്തി ജില്ലാ കളക്ടര്‍ ഹരിത വി കുമാറില്‍ നിന്നാണ് ഇരുവരും പൗരത്വ രേഖകള്‍ ഏറ്റുവാങ്ങിയത്. ജനനം കൊണ്ട് ലഭിച്ച മലേഷ്യന്‍ പൗരത്വമായിരുന്നു ഗുരുവായൂര്‍ സ്വദേശികളായ ഇവര്‍ക്ക് ഇന്ത്യന്‍ പൗരത്വം ലഭിക്കുന്നതിനുള്ള പ്രധാന തടസം.
മലേഷ്യയിലാണ് ജനിച്ചതെങ്കിലും ഇരുവരും വളര്‍ന്നതും വിദ്യാഭ്യാസം നേടിയതും കേരളത്തില്‍ നിന്നാണ്. ഗുരുവായൂര്‍ സ്വദേശി ഷാമില 1993ലാണ് മലേഷ്യന്‍ പൗരനായ അബ്ദുള്‍ റഷീദിനെ വിവാഹം ചെയ്ത് മലേഷ്യയിലേക്ക് പോയത്. മൂന്ന് വര്‍ഷങ്ങള്‍ക്ക് ശേഷം ഈ ദമ്പതികള്‍ക്ക് ഷഫീന, മുഹമ്മദ് റയ്ഹാന്‍ എന്നിവര്‍ ജനിച്ചു. ബിസിനസുകാരനായിരുന്ന അബ്ദുള്‍ റഷീദിന് തന്റെ കച്ചവടത്തില്‍ തിരിച്ചടികള്‍ നേരിട്ടതോടെ ഷഫീന ഒന്നും, രണ്ടും വയസ് മാത്രമുള്ള മക്കളെ കൂട്ടി 1999ല്‍ സ്വന്തം നാട്ടിലെത്തി. അന്നുമുതല്‍ കുട്ടികള്‍ക്ക് മലേഷ്യന്‍ പൗരത്വമായിരുന്നു. വര്‍ഷം തോറും പുതുക്കേണ്ട റസിഡന്‍ഷ്യല്‍ രേഖയിലാണ് ഇത്രയുംനാള്‍ ഇരുവരും വിദ്യാഭ്യാസവും മറ്റ് സാമൂഹിക ആവശ്യങ്ങളും നിറവേറ്റിയിരുന്നത്.
വര്‍ഷംതോറും 7500 രൂപയോളം രേഖകള്‍ക്കായി ഇവര്‍ക്ക് ചെലവ് വന്നിരുന്നു. എന്‍ജിനീയറിങ് കഴിഞ്ഞ മുഹമ്മദ് റിയാന് അനേകം തൊഴില്‍ അവസരങ്ങളാണ് പാസ്‌പോര്‍ട്ട് ഇല്ല എന്ന കാരണത്താല്‍ നഷ്ടമായത്. വിവാഹിതയായ ഷഫീനയ്‌ക്ക് പാസ്‌പോര്‍ട്ട് ഇല്ലാത്തതിനാല്‍ ഭര്‍ത്താവിനൊപ്പം ഗള്‍ഫില്‍ പോകാനും കഴിഞ്ഞില്ല. നീണ്ട നാളത്തെ ശ്രമങ്ങള്‍ക്കൊടുവിലാണ് ഇരുവര്‍ക്കും ഇന്ത്യന്‍ പൗരത്വം ലഭിച്ചത്. പൗരത്വം ലഭിച്ചതോടെ ഇനി ഉടന്‍ പാസ്‌പോര്‍ട്ട് ലഭിക്കുമെന്നും മാറ്റിവച്ച ജീവിതാഭിലാഷങ്ങള്‍ ഓരോന്നും യഥാര്‍ത്ഥ്യമാക്കാന്‍ കഴിയുമെന്നുമുള്ള പ്രതീക്ഷയിലാണ് ഇവര്‍.
പ്രതികരിക്കാൻ ഇവിടെ എഴുതുക: