തിരുവനന്തപുരം: കാണാതായ വനിത ബാങ്ക് മാനേജരുടെ മൃതദേഹം വാമനപുരം ആറ്റില്‍ നിന്നും കണ്ടെത്തി. കോയമ്പത്തൂര്‍ നാച്ചിപ്പാളയം കാനറാ ബാങ്ക് മാനേജര്‍ പുല്ലമ്പാറ കൂനന്‍വേങ്ങ സ്‌നേഹപുരം ഹില്‍വ്യൂവില്‍ ഷെമി(49)യാണ് മുങ്ങിമരിച്ചത്. ചൊവ്വാഴ്ച പുലര്‍ച്ചെ മൂന്നരയോടെയാണ് ഇവരെ കാണാതാകുന്നത്. തുടര്‍ന്ന് പൊലീസില്‍ പരാതി നല്‍കി. ഇന്നലെ രാവിലെയാണ് വാമനപുരം നദിയില്‍ നിന്നും മൃതദേഹം കണ്ടെത്തിയത്. ഫയര്‍ഫോഴ്‌സിന്റെ സഹായത്തോടെയാണ് നദിയില്‍ നിന്നും മൃതദേഹം പുറത്തെടുത്തത്.
ഒരാഴ്ച മുമ്പ് ഷെമിയ്‌ക്ക് സര്‍ജറിക്കു വിധേയയായിരുന്നു. ഇതിനു ശേഷം വിശ്രമത്തിനാണ് തിരുവനന്തപുരത്തെ വീട്ടില്‍ നിന്നും കുടുംബവീട്ടിലെത്തിയത്. ബാങ്ക് ജോലിയുമായി ബന്ധപ്പെട്ട് ഷെമി കടുത്ത സമ്മര്‍ദ്ദത്തിലായിരുന്നുവെന്ന് വീട്ടുകാര്‍ പറയുന്നു. കോയമ്പത്തൂരില്‍ നിന്നും തിരുവനന്തപുരത്തേക്ക് ജോലി മാറ്റാനുള്ള ശ്രമങ്ങള്‍ നടത്തുന്നുണ്ടായിരുന്നു. അതിനിടയിലാണ് ഷെമിയെ കാണാതാകുന്നത്.
പൊലീസ് നായ എത്തിയും അന്വേഷണം നടത്തിയിരുന്നു. ഷെമിയുടെ വീട്ടില്‍ നിന്നും അരക്കിലോമീറ്റര്‍ ദൂരം വരുന്ന വാമനപുരം നദിയുടെ കൈത്തോട് വരെ എത്തിയിരുന്നു. കാണാതാകുമ്പോഴും ഷെമിയുടെ മൊബൈല്‍ ഫോണ്‍ വീട്ടില്‍ തന്നെയുണ്ടായിരുന്നു. പേരൂര്‍ക്കട കാനറാ ബാങ്കുദ്യോഗസ്ഥനായ സലീമാണ് ഭര്‍ത്താവ്. മകന്‍ അക്ബര്‍ സലിം.
പ്രതികരിക്കാൻ ഇവിടെ എഴുതുക: