കൊച്ചി: പാലാരിവട്ടത്ത് മുന്‍ മിസ് കേരളയടക്കം മൂന്നു പേര്‍ വാഹനാപകടത്തില്‍ മരിച്ച സംഭവത്തില്‍ ഫോര്‍ട്ട്‌കൊച്ചിയിലെ നമ്പര്‍ 18 ഹോട്ടലിന്റെ ഉടമ റോയ് ജെ. വയലാട്ടിനെ അറസ്റ്റു ചെയ്തു. ഈ ഹോട്ടലിലെ വിരുന്നില്‍ പങ്കെടുത്ത് മടങ്ങുമ്പോഴാണ് അപകടമുണ്ടായത്. സിസിടിവി ദൃശ്യങ്ങള്‍ അടങ്ങിയ ഹാര്‍ഡ് ഡിസ്‌ക് ഉള്‍പ്പെടെ നിര്‍ണായക തെളിവുകള്‍ നശിപ്പിച്ചതിനാണ് അറസ്റ്റ്.
ഹോട്ടലിലെ അഞ്ച് ജീവനക്കാരെയും അറസ്റ്റു ചെയ്തിട്ടുണ്ട്. റോയിയെ ചൊവ്വാഴ്ച 11 മണിക്കൂറോളം ചോദ്യം ചെയ്തിരുന്നു. റോയി പോലീസിന് കൈമാറിയ ഹാര്‍ഡ് ഡിസ്‌കില്‍ ആവശ്യപ്പെട്ട വിവരങ്ങള്‍ ഇല്ലെന്ന് പോലീസ് കണ്ടെത്തിയിരുന്നു. ഇന്നലെരാവിലെ പാലാരിവട്ടം പോലീസ് സ്റ്റേഷനില്‍ വീണ്ടും ഹാജരായ റോയിയുമായി ഹോട്ടലില്‍ പോലീസ് പരിശോധന നടത്തി. ഇതിനു പിന്നാലെയാണ് അറസ്റ്റ്.
സിസിടിവി ദൃശ്യങ്ങളുള്ള രണ്ട് ഡിവിആറുകളില്‍ ഒന്ന് ഇന്നലെ റോയി ഹാജരാക്കിയിരുന്നു. എന്നാല്‍ ഇത് കേസുമായി ബന്ധപ്പെട്ടതല്ലായിരുന്നു. അപകടമുണ്ടായതിന് പിന്നാലെ റോയി ഹോട്ടലിലെത്തി ഡിവിആര്‍ കൊണ്ടുപോയെന്ന് ജീവനക്കാര്‍ വെളിപ്പെടുത്തിയിരുന്നു.
പ്രതികരിക്കാൻ ഇവിടെ എഴുതുക: