രാജസ്ഥാന്‍: ജോധ്പൂരിലെ ഓള്‍ ഇന്ത്യ ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സിലെ ഡോക്ടര്‍മാരുടെ ഒരു സംഘം റോബോട്ടുകളുടെ സഹായത്താല്‍ നടത്തിയ ലോകത്തിലെ ആദ്യത്തെ അന്നനാള ശസ്ത്രക്രിയ വിജയകരമായി പൂര്‍ത്തിയാക്കി. ഏകദേശം 9 മാസം മുന്‍പ് ആസിഡ് കുടിച്ച് അന്നനാളത്തിന് കേടുപാടുകള്‍ സംഭവിച്ച യുവാവിനാണ് ഇപ്പോള്‍ ശസ്ത്രക്രിയ നടത്തി വിജയിച്ചത്.
ആസിഡ് ഉള്ളില്‍ ചെന്നതിനാല്‍ ഭക്ഷണം കഴിക്കാന്‍ സാധിക്കാതായി. തുടര്‍ന്ന് വയറില്‍ ഘടിപ്പിച്ച ട്യൂബിലൂടെയാണ് ഭക്ഷണം നല്‍കിയിരുന്നത്. എന്നാല്‍ പിന്നീട് കട്ടിയുള്ള ആഹാരവും പാനീയങ്ങളും ഭക്ഷിക്കാന്‍ യുവാവ് വല്ലാതെ ബുദ്ധിമുട്ടി. ഇതിനാലാണ് യുവാവിനെ ശസ്ത്രക്രിയക്ക് വിധേയനാക്കാന്‍ ഡോക്ടര്‍മാര്‍ തീരുമാനിച്ചത്.
ജോധ്പൂര്‍ എയിംസിലെ ഡോക്ടര്‍മാര്‍ പൂര്‍ണമായും രോഗിയെ ഓട്ടോമേറ്റഡ് ഓപ്പറേഷന് വിധേയമാക്കുകയായിരുന്നു. രക്തസ്രാവം കുറച്ചുകൊണ്ട് മുഴുവന്‍ മെഡിക്കല്‍ നടപടിക്രമങ്ങളും പൂര്‍ത്തിയാക്കുകയും ചെയ്തു. ഡോക്ടര്‍മാരുടെ അഭിപ്രായത്തില്‍, രോഗിക്ക് ശസ്ത്രക്രിയയ്‌ക്ക് ശേഷം വേദന കുറവായിരുന്നുവെന്നും. ഓപ്പറേഷന് കഴിഞ്ഞ് നാല് ദിവസത്തിന് ശേഷം രോഗി സ്വാഭാവികമായി ഭക്ഷണപാനീയങ്ങള്‍ കഴിക്കാന്‍ തുടങ്ങുകയും ചെയ്തു. രണ്ട് ദിവസത്തിന് ശേഷം ആശുപത്രിയില്‍ നിന്ന് ഡിസ്ചാര്‍ജും ചെയ്തു. സാധാരണ നിലയിലാണ് ശസ്ത്രക്രിയ നടന്നിരുന്നതെങ്കില്‍ കഴുത്ത്, നെഞ്ച്, വയര്‍ എന്നിവിടങ്ങളില്‍ മുറിവ് ഉണ്ടാവുകയും കൂടുതല്‍ വേദനയ്‌ക്കും കാരണം ആകുമായിരുന്നുവെന്നും ഡോക്ടര്‍മാര്‍ അറിയിച്ചു.
ഈ ശസ്ത്രക്രിയയില്‍, ഡോക്ടര്‍മാര്‍ കേടായ അന്നനാളം നീക്കം ചെയ്യുകയും പുതിയ പൂര്‍ണമായും പ്രവര്‍ത്തനക്ഷമവുമായ ഒന്ന് ഘടിപ്പിക്കുകയും ചെയ്തു. 8 മില്ലീമീറ്റര്‍ ഉള്ള നാല് മുറിവുകള്‍ മാത്രമാണ് ഈ ശസ്ത്രക്രിയയിലൂടെ രോഗിക്ക് ഉണ്ടായത്.
റോബോട്ടിക് ആയുധങ്ങള്‍ ഉപയോഗിച്ച് ശസ്ത്രക്രിയ നടത്താനുള്ള നിര്‍ദ്ദേശം നല്‍കിയത് സര്‍ജിക്കല്‍ ഗ്യാസ്‌ട്രോ എന്‍ട്രോളജി വിഭാഗമാണെന്ന് ജോധ്പൂര്‍ എയിംസ് മെഡിക്കല്‍ സൂപ്രണ്ട് പ്രൊഫ എം കെ ഗാര്‍ഗ് പറഞ്ഞു. ഐവര്‍ലൂയിസ് എസോഫാഗെക്ടമി എന്ന രീതിയാണ് ശസ്ത്രക്രിയയ്‌ക്കായി ഉപയോഗിച്ചത്. ഈ രീതി പ്രകാരം, ദഹനവ്യവസ്ഥയുടെ കേടായ ഭാഗം നീക്കം ചെയ്യുകയും സ്ഥിരമോ താല്‍ക്കാലികമോ ആയ പരിഹാരം കണ്ടെത്തുകയും ചെയ്യാം. 2018 ല്‍ 28 കോടി രൂപ ചെലവില്‍ സ്ഥാപിച്ച ശസ്ത്രക്രിയാ റോബോട്ടിക് സംവിധാനങ്ങള്‍ ലഭിക്കുന്ന രാജസ്ഥാനിലെ ആദ്യത്തെ ആശുപത്രിയായി എയിംസ് ജോധ്പൂര്‍ മാറിയിരിക്കുകയാണ്.
പ്രതികരിക്കാൻ ഇവിടെ എഴുതുക: