ഹരിപ്പാട്ട് വന്‍ മയക്കുമരുന്ന് വേട്ട; ഏഴ് യുവാക്കള്‍ പിടിയില്‍

ഹരിപ്പാട്: മാരകശേഷിയുള്ള മയക്കുമരുന്നുമായി ഏഴ് യുവാക്കള്‍ പോലീസ് പിടിയില്‍. മുതുകുളം അപ്‌സരസ്സില്‍ പ്രണവ് (24), കൃഷ്ണപുരം തേജസ്സില്‍ സജിന്‍ (25), ചേപ്പാട് തട്ടാശ്ശേരില്‍ ശ്രാവണ്‍ (23), മുതുകുളം ഓയൂനിവാസില്‍ അക്ഷയ് (24), ആറാട്ടുപുഴ ഉച്ചരിചിറയില്‍ സച്ചിന്‍(23), പള്ളിപ്പാട് മംഗലപ്പിള്ളിയില്‍ അര്‍ജ്ജുന്‍ (23), മുതുകുളം പുത്തന്‍ മഠത്തില്‍ രഘുരാമന്‍ (24) എന്നിവരാണ് പിടിയിലായത്.  

സിന്തറ്റിക് ഡ്രഗ്ഗ് ഇനത്തില്‍പ്പെട്ട മാരകശേഷിയുള്ള മയക്കുമരുന്നായ മെഥിലിന്‍ ഡയോക്‌സി മെത്ത് ആംഫിറ്റമിന്‍50 ഗ്രാം ആണ് പ്രതികളില്‍ നിന്നും പിടിച്ചെടുത്തത്. ഡാണാപ്പടി മംഗല്യ റിസോട്ടില്‍ മുറിയെടുത്ത് വില്‍പ്പന നടത്തിക്കൊണ്ടിരുന്ന പ്രതികളെ തിങ്കളാഴ്ച പുലര്‍ച്ചെ ജില്ലാ പോലീസ് മേധാവിയുടെ കീഴിലുള്ള ഡാന്‍സാഫും ഹരിപ്പാട് പോലീസും സംയുക്തമായിട്ടാണ് പിടികൂടിയത്. ബാംഗ്ലൂരില്‍ നിന്നും ട്രെയിന്‍ മാര്‍ഗ്ഗം എത്തിക്കുന്ന മയക്കുമരുന്ന് ജില്ലയിലെ യുവാക്കള്‍ക്കും വിദ്യാര്‍ത്ഥികള്‍ക്കും വില്‍ക്കുകയായിരുന്നു.

ഗ്രാമിന് 3000 മുതല്‍ 5000 രൂപയ്‌ക്കാണ് വിറ്റിരുന്നതെന്ന് പോലീസ് പറഞ്ഞു. പ്രതികളിൽ മയക്കുമരുന്ന് വില്‍പ്പനയ്‌ക്ക് ഉപയോഗിച്ചിരുന്ന കാറും സ്‌കൂട്ടറും പോലീസ് പിടിച്ചെടുത്തിട്ടുണ്ട്. നര്‍ക്കോട്ടിക് സെല്‍ ഡിവൈഎസ്പി എം. ആര്‍. ബിനുകുമാറിന്റെ നേതൃത്വത്തിലുള്ള ഡാന്‍സാഫ് ടിമും ഹരിപ്പാട് സര്‍ക്കിള്‍ ഇന്‍സ്‌പെക്ടര്‍ ബിജു വി. നായര്‍, സബ് ഇന്‍സ്‌പെക്ടര്‍ ഗിരീഷ്, എസ് ഐ ഉദയന്‍ സീനിയര്‍ സിപിഒ മാരായ സുരേഷ്, റെജി,സിപിഒ മാരായ നിഷാദ്,സിജു,രതീഷ് ബാബു, ഡാന്‍സാഫ് എസ്‌ഐ ഇല്യാസ്, എഎസ്‌ഐ സന്തോഷ്, സിപിഒമാരായ ഹരികൃഷ്ണന്‍, ഷാഫി എന്നിവരടങ്ങുന്ന സംഘംമാണ് പ്രതികളെ അറസ്റ്റ് ചെയ്തത്.