തൃശൂര്‍ : മണ്ണുത്തി കാര്‍ഷിക സര്‍വ്വകലാശാല ഹോസ്റ്റലില്‍ വിദ്യാര്‍ത്ഥിയെ ആത്മഹത്യ ചെയ്ത നിലയില്‍. പാലക്കാട് കൊഴിഞ്ഞാമ്പാറ സ്വദേശി മഹേഷിനെ ആണ് മരിച്ച നിലയില്‍ കണ്ടെത്തിയത്. മണ്ണൂത്തി കാര്‍ഷിക സര്‍വ്വകലാശാല ക്യാമ്പസിലെ ഹോര്‍ട്ടികള്‍ച്ചര്‍ കോളേജിലെ ഒന്നാം വര്‍ഷ വിദ്യാര്‍ത്ഥിയായിരുന്നു മഹേഷ്.
ക്ലാസ്സുകള്‍ പുനരാരംഭിച്ചതിനെ തുടര്‍ന്ന് ഒരാഴ്ച മുമ്പാണ് ക്യാമ്പസിലെത്തിയത്. ആണ്‍കുട്ടികളുടെ ഹോസ്റ്റലായ പമ്പയിലായിരുന്നു താമസം. ക്യാമ്പസില്‍ നിന്ന് പഠനം പൂര്‍ത്തിയാക്കി പുറത്തിറങ്ങിയ ചിലര്‍ ശനിയാഴ്ച രാത്രി ഹോസ്റ്റലില്‍ എത്തിയിരുന്നു. ഇവര്‍ പോയശേഷം രാത്രി 12 മണിക്കാണ് മഹേഷിനെ മുറിയില്‍ തൂങ്ങി മരിച്ച നിലയില്‍ കണ്ടെത്തിയത്. കഴിഞ്ഞദിവസം രാത്രി ഏറെ വൈകിയും മഹേഷ് ഫോണില്‍ സംസാരിച്ചിരുന്നതായി സഹപാഠികള്‍ അറിയിച്ചു.
മരണത്തില്‍ ദുരൂഹതയുണ്ടെന്നാണ് എസ്എഫ്‌ഐയുടെ പരാതി. ഇക്കാര്യം അന്വേഷിക്കണമെന്നാവശ്യപ്പെട്ട് ജില്ലാ പോലീസ് മേധാവിയ്‌ക്ക് എസ്എഫ്‌ഐ പരാതി നല്‍കി. ഹോസ്റ്റലില്‍ കഴിഞ്ഞദിവസം രാത്രി റാഗിങ്ങ് ഉണ്ടായിട്ടുണ്ട്. ഇതിനെ തുടര്‍ന്നാണ് മഹേഷ് ആത്മഹത്യ ചെയ്തതെന്നാണ് എസ്എഫ്‌ഐയുടെ ആരോപണം.
വീട്ടില്‍ മഹേഷിന് മറ്റ് യാതൊരു പ്രശ്‌നങ്ങളും ഉണ്ടായിരുന്നില്ലെന്ന് ബന്ധുക്കളും വ്യക്തമാക്കി. കോളേജില്‍ വന്ന ശേഷം എന്താണ് സംഭിച്ചത് എന്ന് അറിയില്ലെന്നും അവര്‍ അറിയിച്ചു. അതേസമയം മഹേഷിന്റെ ആത്മഹത്യാ കുറിപ്പ് കണ്ടുകിട്ടിയതായി പോലീസ് അറിയിച്ചു. ഇതില്‍ റാഗിങ്ങിനെ കുറിച്ച് യാതൊരു പരാമര്‍ശവുമില്ല. പ്രണയബന്ധം തകര്‍ന്നതാണോ ആത്മഹത്യക്ക് കാരണമായതെന്നും പോലീസ് സംശയിക്കുന്നു. മഹേഷിന്റെ ഫോണ്‍ പരിശോധിച്ചു വരികയാണ്.
പ്രതികരിക്കാൻ ഇവിടെ എഴുതുക: