പാലക്കാട് : കഞ്ചിക്കോട് വാഹനപരിശോധനയ്‌ക്കിടെ നിര്‍ത്താതെ പോയ കാറില്‍ നിന്നും കഞ്ചാവ് 100 കിലോയുടെ ചാക്കുകെട്ടുകള്‍ പിടിച്ചെടുത്തു. രാവിലെ എക്സൈസ് സംഘം വാഹന പരിശോധന നടത്തുന്നതിനിടെയാണ് കാര്‍ നിര്‍ത്താതെ പോയത്. തുടര്‍ന്ന് അന്വേഷണ സംഘം ഇവരെ പിന്തുടര്‍ന്ന് പിടികൂടുകയായിരുന്നു.
പരിശോധനയ്ക്കിടെ അമിത വേഗതയില്‍ പോയ കാര്‍ ടാങ്കറിലും ബൈക്കിലും ഇടിച്ചു. ടയര്‍ പൊട്ടിയതോടെ ഡിവൈഡറില്‍ ഇടിച്ചുനിന്ന കാര്‍ എക്സൈസ് കസ്റ്റഡിയിലെടുകയായിരുന്നു. വാഹനത്തിലുണ്ടായിരുന്ന രണ്ടു പേരെ അറസ്റ്റ് ചെയ്തു. ഇരുവരും വാഹനത്തില്‍ നിന്നും ഇറങ്ങിയോടാന്‍ ശ്രമിക്കുന്നതിനിടെയാണ് പിടിയിലായത്.
മഞ്ചേരി സ്വദേശികളായ രാജേഷ്, ഷിഹാബ് എന്നിവരാണ് അറസ്റ്റിലായത്. അപകടത്തില്‍പ്പെട്ട സ്വിഫ്റ്റ് കാര്‍ ഏതാണ്ട് പൂര്‍ണമായും തകര്‍ന്നു. നാല് ചാക്കുകളിലായി നൂറുകിലോയോളം കഞ്ചാവാണ് പിടികൂടിയത്. എക്സൈസ് സംഘം അന്വേഷണം ആരംഭിച്ചു. പാലക്കാട് എക്സൈസ് അസിസ്റ്റന്റ് കമ്മിഷണറുടെ സേതൃത്വത്തിലുള്ള പ്രത്യേക സംഘമാണ് പരിശോധന നടത്തിയത്. അപകടത്തില്‍പ്പെട്ട പ്രതികളുടെ പരുക്ക് സാരമല്ല.
പ്രതികരിക്കാൻ ഇവിടെ എഴുതുക: