അഹമ്മദാബാദ്: പുഴയില് തള്ളിയിട്ട് 12 വയസുകാരനായ മകനെ കൊന്ന പിതാവ് പിടിയില്. സൂറത്ത് സ്വദേശി സയീദ് ഇലയാസ് ഷെയ്ഖിനെയാണ് പോലീസ് അറസ്റ്റ് ചെയ്തത്. അപകടമരണമായിരുന്നു എന്നാണ് ഇയാള് പോലീസിന് മൊഴി കൊടുത്തത്. പിതാവിന്റെ പ്രവൃത്തികളില് സംശയം തോന്നിതിനെ തുടര്ന്ന് പോലീസ് നടത്തിയ അന്വേഷണത്തിലായിരുന്നു കൊലപാതകമാണെന്ന് തെളിഞ്ഞത്.
മകന് തന്റേതല്ലായെന്ന സംശയമാണ് ഇയാളെ കൊല നടത്താന് പ്രേരിപ്പിച്ചത്. ഭാര്യയ്ക്ക് വേറൊരു അവിഹിത ബന്ധത്തിലുണ്ടായതാണ് കൊല്ലപ്പെട്ട സക്കീര് എന്ന് ഇയാള് വിശ്വസിച്ചിരുന്നു. ഭാര്യയുമായി വഴക്കിട്ട് പ്രതി തന്റെ മാതാപിതാക്കളോടൊപ്പമാണ് മൂന്ന് വര്ഷമായി താമസിച്ച് വന്നിരുന്നത്. ഭാര്യ മറ്റൊരാളുമായി അവിഹിത ബന്ധം പുലര്ത്തിയിരുന്നെന്ന് ആരോപിച്ച് ഇരുവരും തമ്മില് പ്രശ്നമുണ്ടായിരുന്നു. തന്റെ മകനായി സക്കീറിനെ ഇയാള് അംഗീകരിച്ചിരുന്നില്ലായെന്നും ബന്ധുക്കള് പറയുന്നു.
സെല്ഫി എടുക്കാന് ശ്രമിക്കുന്നതിനിടെ മകന് കാല് വഴുതി വീണെന്നായിരുന്നു ഇയാള് മറ്റുളളവരെ ധരിപ്പിച്ചത്. വിവരമറിഞ്ഞെത്തിയ പൊലീസും ഫയര്ഫോഴ്സും തെരച്ചില് നടത്തി. കഴിഞ്ഞ ദിവസമാണ് നദിയില് നിന്ന് മൃതദേഹം കണ്ടെത്തിയത്.
