ഫേസ്ബുക്ക് മാതൃകമ്പനി മെറ്റയുടെ കീഴിലുള്ള പ്ലാറ്റ്‌ഫോമുകളില്‍ നിന്ന് ഇന്ത്യക്കാരുടെ ഏകദേശം മൂന്നുകോടി പോസ്റ്റുകള്‍ നീക്കം ചെയ്തതായി കമ്പനി അറിയിച്ചു. 2021 ഐടി നിയമങ്ങള്‍ക്ക് അനുസൃതമായി ഫേസ്ബുക്ക് പ്ലാറ്റ്‌ഫോമില്‍ നിന്നും 2.69 കോടി പോസ്റ്റുകളും, ഇന്‍സ്റ്റഗ്രാമില്‍ നിന്നും 32 ലക്ഷം പോസ്റ്റുകളും നീക്കം ചെയ്തു എന്നാണ് കണക്കുകള്‍ പറയുന്നത്.
കമ്പനിയുടെ തന്നെ ഓട്ടോമേറ്റീവ് ടൂള്‍ ഉപയോഗിച്ചാണ് ഈ പോസ്റ്റുകളില്‍ ഭൂരിഭാഗവും നീക്കം ചെയ്തത് എന്നാണ് റിപ്പോര്‍ട്ട്. ഇതിന് പുറമേ ഉപയോക്താക്കളുടെ പരാതിയിലും പോസ്റ്റുകള്‍ക്കെതിരെ നടപടി എടുത്തിട്ടുണ്ട്. ഇതും മെറ്റ പുറത്തിറക്കിയ റിപ്പോര്‍ട്ടില്‍ പറയുന്നു. എല്ലാ മാസങ്ങളും ഇത്തരം റിപ്പോര്‍ട്ട് പ്രസിദ്ധീകരിക്കുമെന്നും മെറ്റ വ്യക്തമാക്കി
കഴിഞ്ഞ മെയ് മാസത്തില്‍ കേന്ദ്രസര്‍ക്കാര്‍ ഐടി നിയമം അനുസരിച്ച് ഫേസ്ബുക്ക് പരാതി പരിഹാര ഓഫീസറെ നിയമിച്ചിരുന്നു. സെപ്തംബര്‍ മാസത്തില്‍ ഫേസ്ബുക്ക് ഗ്രീവന്‍സ് സംവിധാനത്തിലൂടെ 708 പരാതികള്‍ ലഭിച്ചിരുന്നു. ഇതില്‍ 589 പരാതികള്‍ക്ക് പരിഹാരം കാണാന്‍ സാധിച്ചുവെന്നാണ് മെറ്റ അധികൃതര്‍ പറയുന്നത്.
3 കോടിയില്‍ 33,600 പോസ്റ്റുകള്‍ വിദ്വേഷ പ്രചാരണത്തെ തുടര്‍ന്നും, 516,800 പോസ്റ്റുകള്‍ നഗ്‌നത, ലൈംഗികത എന്നീ ആരോപണങ്ങളാലും, 307000 പോസ്റ്റുകള്‍ ഭീഷണി, വ്യക്തി സുരക്ഷ എന്നിവ പരിഗണിച്ചുമാണ് നീക്കം ചെയ്തതെന്ന് കമ്പനി അറിയിച്ചു.
മൂന്ന് രീതിയിലാണ് പോസ്റ്റുകള്‍ക്കെതിരെ ഫേസ്ബുക്ക് നടപടി എടുക്കുന്നത്. അതില്‍ ഒന്ന് ഫേസ്ബുക്ക് തന്നെ വികസിപ്പിച്ച ആര്‍ട്ടിഫിഷല്‍ ഇന്റലിജന്‍സ് ടൂള്‍ വച്ചാണ്, രണ്ടാമത്തേത് ഫേസ്ബുക്ക് കമ്യൂണിറ്റിയുടെ സഹായം ഉപയോഗിച്ചും, മൂന്നാമത് ഫേസ്ബുക്ക് സ്വന്തം ടീമിനെ വച്ച് മാനുവലായി നടത്തുന്ന ഇടപെടലുമാണ്.
പ്രതികരിക്കാൻ ഇവിടെ എഴുതുക: