പ്രൊഫ. കെ. കെ. കൃഷ്ണന് നമ്പൂതിരി
നിര്ഗുണനായ ഒരേയൊരു ഈശ്വരനെത്തന്നെയാണ് സഗുണനായി സങ്കല്പ്പിക്കപ്പെട്ട് ഹിന്ദുക്കളുടെ ക്ഷേത്രങ്ങളില് ആരാധിക്കുന്നത്. അതു നിമിത്തമാണ് ക്ഷേത്രപൂജകളിലെല്ലാം (വിവിധങ്ങളായ നാമങ്ങള് ഉപയോഗിച്ച് വിവിധ ദേവന്മാരും ദേവിമാരുമായി സങ്കല്പിച്ച് നടത്തപ്പെടുന്ന പൂജകളിലെല്ലാം) ഒരേ ആത്മാവിനെത്തന്നെ ആവാഹിച്ച് ഉപാസന നടത്തുന്നത്. തന്നെയല്ല, അനേകം ദേവന്മാരെ ഉദ്ദേശിച്ചും അവരോടുള്ള പ്രാര്ത്ഥനകള് ഉള്പ്പെടുത്തിയുമുള്ള ക്ഷേത്രപൂജകള്ക്ക് പലപ്പോഴും ഒരേ സൂക്തങ്ങളും വേദമന്ത്രങ്ങളും തന്നെ ഉപയോഗിച്ചു വരികയും ചെയ്യുന്നു.
ദേവാലയങ്ങളില് ഉപാസ്യരായ ദേവമൂര്ത്തികളെല്ലാം അത് വിഷ്ണുവാകട്ടെ, ശിവനാകട്ടെ, ഏതെങ്കിലും ദേവിയാകട്ടെ, ശാസ്താവാകട്ടെ, സുബ്രഹ്മണ്യനാകട്ടെ, ഗണപതിയാവട്ടെ, ആദിത്യനാകട്ടെ ഇവരിലാരായാലും തത്ത്വത്തില് ഒരേ ഈശ്വരന് തന്നെയാണെന്നുള്ള തിരിച്ചറിവ്, ഹൈന്ദവര്ക്കുണ്ട്. അതുകൊണ്ടു തന്നെയാണ് ക്ഷേത്രങ്ങളില് കൈകൂപ്പി തൊഴുമ്പോള് ഭഗവാനേ ദൈവമേ, അനുഗ്രഹിക്കണേ, രക്ഷിക്കണേ എന്നെല്ലാം സമാനമായി പ്രാര്ത്ഥിക്കുന്നത്. തന്നെയല്ല, പൂജകള്ക്ക് മന്ത്രങ്ങള് പ്രയോഗിക്കുമ്പോള് മന്ത്രാരംഭത്തില് മുഖ്യമൂര്ത്തിയെന്ന നിലയിലായാലും ഉപദേവതയെന്ന നിലയിലായാലും പ്രണവവും (ഓകാരം) ഉപയോഗിച്ചിരിക്കണമെന്നത് നിര്ബന്ധമാണല്ലോ. ‘ഓം’ എന്നത് നിര്ഗുണ ബ്രഹ്മത്തിന്റെ ദ്യോതകമാണ്, പ്രതീകവുമാണ്. മാത്രമല്ല, സഗുണരായ ത്രിമൂര്ത്തികളുടെ സമഷ്ടി രൂപവുമാണ്. (അ, ഉ, മ്) ഈ മൂന്നു സ്വരങ്ങളുടെ സമഷ്ടിയാണ് ഓം. അവ തന്നെ ത്രിമൂര്ത്തികളുടെ പ്രതീകവും. എന്നാല് സന്ദര്ഭത്തിന്റെ പ്രത്യേകതയനുസരിച്ച് ത്രിമൂര്ത്തികളില് ഒരു ദേവനെത്തന്നെ പരമാത്മാവും സര്വേശ്വരനുമായി കണ്ടുകൊണ്ട് ഉപാസിക്കുകയും ചെയ്യുന്നു. ആ സര്വ്വേശ്വരന്റെ കീഴില് സൂര്യാദി ദേവന്മാര് തങ്ങളുടെ കര്ത്തവ്യങ്ങള് പാലിച്ചു കൊണ്ട് ലോകരക്ഷണം ചെയ്തു കൊണ്ടിരിക്കുന്നതായിട്ടാണ് വിശ്വാസം. ആ ദേവന്മാരെല്ലാം അതാതു പ്രവൃത്തികളെ സംബന്ധിച്ചേടത്തോളം ഈശ്വരന്റെ പ്രതിപുരുഷന്മാരെന്ന നിലയില് ഈശ്വരന് തന്നെയായി മാനിക്കപ്പെടുന്നതും ഏകദൈവ വിശ്വാസത്തിന് ഭംഗം വരുത്തുന്നില്ല. അതുകൊണ്ടാണല്ലോ, ‘സര്വ്വ ദേവ നമസ്ക്കാരഃ കേശവം പ്രതിഗച്ഛതി’ എന്നു പറയാറുള്ളത്. ഇവിടെ കേശവന് എന്നുള്ളതിന് സര്വ്വേശ്വരന് എന്നു തന്നെയാണ് അര്ത്ഥം.
ഈ ഏകദൈവ വിശ്വാസം തന്നെയാണ് ശ്രീനാരായണ ഗുരുദേവന് സമസ്ത ജാതികള്ക്കും സമസ്ത മനുഷ്യര്ക്കും ബാധകമാം വിധം ‘ഒരു ജാതി ഒരു മതം ഒരു ദൈവം മനുഷ്യര്ക്ക്’ എന്ന് വ്യാപകമായി ഉപദര്ശനം ചെയ്തിട്ടുള്ളത്.
