ന്യൂയോര്‍ക്ക്: ഗൂഗിളിന്റെ സുരക്ഷ വീഴ്ച സംബന്ധിച്ച പുതിയ വിവരങ്ങള്‍ പുറത്ത്. ആന്‍ഡ്രോയിഡ് ഉപയോക്താക്കള്‍ക്ക് ഗൂഗിളിന്റെ ഭാഗത്തു നിന്ന് മറ്റൊരു മോശം വാര്‍ത്ത കൂടി പുറത്തുവന്നിരിക്കുന്നു. ഉപയോക്താക്കളുടെ സ്വകാര്യ വിവരങ്ങള്‍ ശേഖരിച്ചുവെന്ന് സംശയിക്കുന്ന നൂറിലധികം ആപ്ലിക്കേഷനുകള്‍ പ്ലേ സ്റ്റോറില്‍ നിന്ന് നീക്കം ചെയ്ത് ഗൂഗിള്‍. ഈ ആപ്ലിക്കേഷനുകളില്‍ ‘അള്‍ട്ടിമ എസ്എംഎസ്’ (UltimaSMS) എന്ന ഒരു മാല്‍വെയര്‍ ഫീച്ചര്‍ ചെയ്തിരുന്ന ആപ്പുകള്‍ പോലുമുണ്ടായിരുന്നുവെന്നാണ് വിവരം. ഇത് കൂടുതല്‍ ഉപയോക്താക്കളെ വലയില്‍ വീഴ്തിയെന്നും കണ്ടെത്തി.
കഴിഞ്ഞ ദിവസം ഗൂഗിള്‍ ക്രോമിന് ഗുരുതര സുരക്ഷാ പിഴവുകളുണ്ടെന്ന് ഗൂഗിള്‍ തുറന്നു സമ്മതിച്ചിരുന്നു. ഇതിനു പിന്നാലെയാണ് ഈ വാര്‍ത്തയും പുറത്തു വരുന്നത്. ‘ടെക്സ്റ്റ് സ്‌കാം’ എന്നു സംശയിക്കാത്ത വിധം ഈ മാല്‍വെയറിന് ഉപയോക്താക്കളെ പ്രീമിയം സേവനങ്ങളിലേക്ക് സൈന്‍ ഇന്‍ ചെയ്യിപ്പിക്കാന്‍ കഴിഞ്ഞു. ഇത് ഉപയോഗിക്കാന്‍ നിര്‍ബന്ധിക്കപ്പെട്ടതുകാരണം ആന്‍ഡ്രോയിഡ് ഉടമകള്‍ക്ക് പ്രതിമാസം 40 ഡോളര്‍ എങ്കിലും ചെലവാകും.
പ്രമുഖ ആന്റി വയറസ് കമ്പനിയായ അവാസ്റ്റിലെ സാങ്കേതിക വിദഗ്ധരാണ് ഈ തട്ടിപ്പ് കണ്ടെത്തിയത്. ഭീഷണിയെക്കുറിച്ച് അറിയിച്ചയുടന്‍ ഇത്തരത്തിലുള്ള ആപ്ലിക്കേഷനുകളെ തല്‍ക്ഷണം ഗൂഗിള്‍ പ്ലേ സ്റ്റോറില്‍ നിന്ന് നീക്കി. എന്നാല്‍ നീക്കം ചെയ്യുന്നതിനു മുന്‍പ് തന്നെ ഈ ആപ്പുകള്‍ ദശലക്ഷക്കണക്കിന് തവണ ഡൗണ്‍ലോഡ് ചെയ്യപ്പെട്ടിരുന്നു. കസ്റ്റമൈസ് ചെയ്യാനാകുന്ന കീബോഡുകള്‍, ക്യൂ ആര്‍ കോഡ് സ്‌കാനറുകള്‍, വീഡിയോ, ഫോട്ടോ എഡിറ്ററുകള്‍, സ്പാം കോള്‍ ബ്ലോക്കറുകള്‍, ക്യാമറ ഫില്‍ട്ടറുകള്‍, ഗെയിമുകള്‍ തുടങ്ങിയ ജനപ്രിയ സേവനങ്ങളുടെ മറവിലാണ് ഈ ആപ്പുകള്‍ തട്ടിപ്പു നടത്തിയത്.
അവാസ്റ്റിന്റെ നിഗമനങ്ങളനുസരിച്ച് ടിക് ടോക്, ഇന്‍സ്റ്റഗ്രാം തുടങ്ങിയ സാമൂഹിക മാധ്യമങ്ങളിലെ പരസ്യങ്ങള്‍ വഴിയും ആപ്പുകള്‍ പ്രചരിക്കപ്പെട്ടിരുന്നു. ഇത് ഇത്തരം ആപ്പുകളുടെ ജനപ്രീതി വര്‍ദ്ധിപ്പിക്കാന്‍ സഹായിച്ചു. ഡൗണ്‍ലോഡ് ചെയ്യുമ്പോള്‍ തന്നെ ഉപയോക്താക്കളുടെ ലൊക്കേഷന്‍, ഐഎംഇഐ, ഫോണ്‍ നമ്പര്‍ എന്നിവ പരിശോധിക്കാന്‍ തുടങ്ങും. ഇത്തരത്തിലുള്ള ഒരു ആപ്ലിക്കേഷന്‍ ഉപയോക്താവ് തുറക്കുമ്പോള്‍, ആപ്പ് ഉപയോഗിക്കുന്നതിന്, അവരുടെ ഫോണ്‍ നമ്പറും ചിലപ്പോള്‍ അവരുടെ ഇമെയിലും നല്‍കാന്‍ ആവശ്യപ്പെടും. ഈ വിവരങ്ങള്‍ സമര്‍പ്പിക്കുമ്പോള്‍ ഉപയോക്താവിനെ പ്രീമിയം എസ്എംഎസ് സബ്സ്‌ക്രിപ്ഷനായി സൈന്‍ അപ്പ് ചെയ്യപ്പെടും.
പ്ലേ സ്റ്റോറില്‍ കൊള്ളാവുന്ന തരത്തില്‍ നിര്‍മിച്ച ആപ്പ് പ്രൊഫൈലുകള്‍ വഴി ഈ ആപ്പുകള്‍ യഥാര്‍ത്ഥ ആപ്ലിക്കേഷനുകളായി വേഷം മാറിയാണ് ഉപയോക്താക്കളെ പറ്റിക്കുന്നത്. ഈ പ്രൊഫൈലുകള്‍ നന്നായി എഴുതിയ വിവരണങ്ങളോടെയും ആകര്‍ഷകമായ ഫോട്ടോകളോടെയുമാണ് പ്ലേ സ്റ്റോറില്‍ പ്രത്യക്ഷപ്പെട്ടത്. കൂടാതെ പലപ്പോഴും ഉയര്‍ന്ന റേറ്റിങ്ങുമുണ്ട്. എന്നിരുന്നാലും, സൂക്ഷ്മമായി പരിശോധിക്കുമ്പോള്‍ അവയ്‌ക്കെല്ലാം പൊതുവായ സ്വകാര്യതാ നയങ്ങളും, ഇമെയില്‍ വിലാസങ്ങളുള്‍പ്പടെയുള്ള അടിസ്ഥാന ഡെവലപ്പര്‍ പ്രൊഫൈലുകളുമാണ് കാണാനാവുക. ഇതിനൊപ്പം തന്നെ ഈ ആപ്പുകള്‍ക്ക് ഉപയോക്താക്കളില്‍ നിന്ന് നിരവധി നെഗറ്റീവ് റിവ്യൂകളുമുണ്ട്. ഇത് ആപ്പുകളെ തിരിച്ചറിയാന്‍ സഹായിക്കുന്നു. നിര്‍ഭാഗ്യവശാല്‍ ഒരുപാട് കുട്ടികള്‍ ഈ തട്ടിപ്പിന് ഇരയായതായാണ് റിപ്പോര്‍ട്ട്.
പ്രതികരിക്കാൻ ഇവിടെ എഴുതുക: