കോഴിക്കോട്: മിഠായിതെരുവില് മാനദണ്ഡങ്ങള് പാലിക്കാതെയാണ് കെട്ടിടങ്ങള് നിര്മ്മിച്ചെതെന്നും ഇത് തീപ്പിടുത്ത സാധ്യത വര്ധിപ്പിക്കുന്നതായും പോലീസ്. സെപ്തംബര് പത്തിനുണ്ടായ തീപിടുത്തത്തിന്റെ പശ്ചാത്തലത്തില് സ്പെഷ്യല് ബ്രാഞ്ച് തയ്യാറാക്കിയ റിപ്പോര്ട്ടിലാണ് വിശദാംശങ്ങള്.
കെട്ടിടങ്ങള് ചട്ടങ്ങള് പാലിക്കാതെയാണ് നിര്മ്മിച്ചതും പ്രവര്ത്തിക്കുന്നതും. പല കടകളിലും അളവില് കൂടുതല് സാധനങ്ങള് സൂക്ഷിച്ചിട്ടുണ്ട്. കോണിപ്പടികളിലും വരാന്തകളിലും വഴികളിലുമടക്കം സാധന സാമഗ്രികള് കൂട്ടിയിട്ടിരിക്കുന്നു. കടമുറികള് തമ്മില് അകലമില്ലാത്തത് തീപ്പിടുത്തം പോലുള്ള അപകടങ്ങളുടെ ആഘാതം കൂട്ടും.
പല കെട്ടിടങ്ങളിലും ഫയര് എക്സിറ്റുകളില്ല. കടമുറികളില് ജീവനക്കാര് പാചകം ചെയ്യുന്നത് അപകടത്തിന് കാരണമാകും. ഒരു പ്ലഗ് പോയിന്റില് നിന്ന് നിരവധി വയറുകളുപയോഗിച്ചാണ് വൈദ്യുതി എടുക്കുന്നത്. വയറിംഗുകള് പലതും പഴക്കമേറിയതിനാല് അപകടാവസ്ഥയിലാണ്. ഫയര് എക്സ്റ്റിംഗ്യൂഷര് പോലുള്ള സംവിധാനങ്ങള് പല കടകളിലുമില്ല. ഇത് പ്രതിസന്ധി ഇരട്ടിയാക്കും. ഈ സാഹചര്യത്തില് അടിയന്തര നടപടി സ്വീകരിച്ചില്ലെങ്കില് കൂടുതല് അത്യാഹിതങ്ങളുണ്ടാകുമെന്ന മുന്നറിയിപ്പും റിപ്പോര്ട്ടിലുണ്ട്.
റിപ്പോര്ട്ട് ജില്ലാ കലക്ടര്ക്കും കോഴിക്കോട് കോര്പ്പറേഷനും കൈമാറും. തിപ്പിടുത്തം സംബന്ധിച്ച് നേരത്തെ അഗ്നിശമനസേനാ വിഭാഗവും വിശദമായ റിപ്പോര്ട്ട് സര്ക്കാരിന് സമര്പ്പിച്ചിരുന്നു.
