ബെര്ലിന്: പരിക്കില് നിന്ന് മോചിതനായി കളിക്കളത്തില് തിരിച്ചെത്തിയ എര്ലിങ് ഹാലാന്ഡിന്റെ ഇരട്ട ഗോളില് ബൊറൂസിയ ഡോര്ട്ടമുണ്ടിന് ജയം. ബുന്ദസ്ലിഗയിലെ എട്ടാം റൗണ്ടില് ഡോര്ട്ട്മുണ്ട് ഒന്നിനെതിരെ മൂന്ന് ഗോളുകള്ക്ക് മെയിന്സിനെ പരാജയപ്പെടുത്തി. 54-ാം മിനിറ്റില് പെനാല്റ്റിയിലൂടെ ഗോള് നേടിയ ഹാലാന്ഡ് ഇഞ്ചുറി ടൈമില് രണ്ടാം ഗോളും സ്കോര് ചെയ്തു. ക്യാപ്റ്റന് മാര്ക്കോ ഒരു ഗോള് അടിച്ചു.
പേശീ സംബന്ധമായ പ്രശ്നങ്ങളെ തുടര്ന്ന് ഹാലാന്ഡിന് നേരത്തെ നടന്ന മൂന്ന് മത്സരങ്ങളില് കളിക്കാനായില്ല. ഹാലാന്ഡിനെ കൂടാതെ കളിച്ച മൂന്ന് മത്സരങ്ങളില് ഡോര്ട്ട്മുണ്ട്് ബോറൂസിയ എംഗ്ലാഡ്ബാച്ചിനോട് തോറ്റു. സ്പോര്ട്ടിങ് ലിസ്ബണും ഓഗസ്ബര്ഗിനും എതിരെ കഷ്ടിച്ച് ജയിച്ചുകയറി.
മെയിന്സിനെ വീഴ്ത്തിയതോടെ ഡോര്ട്ട്മുണ്ട് നിലവിലെ ചാമ്പ്യന്മാരായ ബയേണ് മ്യൂണിക്കിനെയും ബയര് ലെവര്കുസനെയും മറികടന്ന് ഒന്നാം സ്ഥാനത്തെത്തി. എട്ട് മത്സരങ്ങളില് ഡോര്ട്ട്മുണ്ടിന് പതിനെട്ട്് പോയിന്റുണ്ട്. ഏഴു മത്സരങ്ങളില് പതിനാറ് പോയിന്റുള്ള ബയേണ്മ്യൂണിക്കാണ് രണ്ടാം സ്ഥാനത്ത്.
ജന്മഭൂമി ഓണ്ലൈന്