പരബ്രഹ്മവും പരാശക്തിയും ഒന്നുതന്നെയെന്നറിയുക. പരാശക്തിയുടെ മായാവൈഭവത്താലാണ് പരബ്രഹ്മം ത്രിമൂര്‍ത്തികളായി മാറുന്നത്. സൃഷ്ടി സ്ഥിതി സംഹാരകാരകങ്ങളായ ബ്രഹ്മാവിഷ്ണുമഹേശ്വരന്മാരുടെ നിയാമക ശക്തിയായി വിരാജിക്കുകയാണ് ദേവി. ഇവിടെ നാം ദേവിയുടെ അഞ്ചു രൂപങ്ങള്‍ അടുത്തു കാണുക. ദുര്‍ഗ്ഗ, ലക്ഷ്മി, സരസ്വതി, സാവിത്രി, രാധ എന്നിങ്ങനെ പഞ്ചദേവിമാര്‍.
1. ദുര്‍ഗ്ഗാദേവി
വനപര്‍വ്വതാദി ദുര്‍ഗമ സ്ഥാനങ്ങളില്‍ വസിക്കുന്നവള്‍ ദുര്‍ഗ. ഈ ദേവിക്ക് സ്വഭാവം രണ്ടു പ്രകാരത്തില്‍. ഒന്നു ഭയങ്കരം, മറ്റേതു ശാന്തം. ഭയാനക ഗാത്രിയാകുമ്പോള്‍ കാളി, ചണ്ഡി, ഭൈരവി, ശ്യാമ എന്നിങ്ങനെ പേരുകള്‍. ശാന്ത രൂപിണിയാകുമ്പോള്‍ ഉമ, ശങ്കരി, ജഗന്മാതാ, പാര്‍വ്വതി, ഭവാനി, ഹൈമവതി എന്നൊക്കെ പേരുകള്‍.
ആയിരം വര്‍ഷങ്ങള്‍ ഹിമാലയത്തിലിരുന്ന് ശക്തിയെ ധ്യാനിച്ചു തപസ്സു ചെയ്ത് സര്‍വ്വവന്ദ്യയായിത്തീര്‍ന്ന ദുര്‍ഗാദേവി സന്യാത്മികയും സര്‍വ്വശക്തി സ്വരൂപിണിയുമാണ്. അസുരന്മാരുടെ മേല്‍ ദുര്‍ഗ്ഗാദേവിയ്‌ക്കുണ്ടായ വിജയത്തെ പ്രകീര്‍ത്തിക്കുന്ന മാര്‍ക്കണ്ഡേയ പുരാണ ഭാഗമാണ് ‘ദേവിമാഹാത്മ്യം’. ദേവീ ഭക്തന്മാര്‍ ഭാരതത്തിലങ്ങളോമിങ്ങോളം ഇതു പാരായണം ചെയ്യുന്നു. ഭയഭക്തിവിശ്വാസങ്ങളെ ഇതുളവാക്കുന്നു എന്നതാണ് സത്യം.
2. ലക്ഷ്മി ദേവി
പാലാഴിയില്‍ നിന്നും ഉണ്ടായവള്‍. ധനത്തിന്റെയും ഐശ്വര്യത്തിന്റെയും അധിദേവത. പരമാത്മാവിന്റെ ശുദ്ധസത്വ സ്വരൂപിണിയാണ് പത്മാദേവിയായ മഹാലക്ഷ്മി. സര്‍വ്വസമ്പല്‍ സ്വരൂപിണി തന്നെ ലക്ഷ്മീദേവി. നൂറ് ദിവ്യയുഗം പുഷ്‌ക്കരത്തില്‍ ശക്തിയെ ഉപാസിച്ചു തപസ്സുചെയ്തതിനാല്‍ ലക്ഷ്മിദേവിയ്‌ക്ക് വരം ലഭിക്കുകയുണ്ടായി.
3. സരസ്വതി ദേവി
വാക്കിന്റെ അനശ്വരനായികയാണ് സരസ്വതി ദേവി. ബുദ്ധി, വിദ്യ, ജ്ഞാനം, ഇവയ്‌ക്കെല്ലാം അധിഷ്ഠാത്രിയാണ് ദേവി. ഗന്ധമാദനത്തില്‍ ആയിരം വര്‍ഷം തപസ്സുചെയ്ത് സര്‍വ്വപൂജ്യയായി സരസ്വതീദേവി. ബ്രഹ്മലോകത്തുള്ള മാനസരസ്സില്‍ ക്രീഡാലോലുപയാണ് ദേവി. വിജയദശമി അക്ഷരകലയുമായി ബന്ധപ്പെടുന്നു.
4. സാവിത്രീദേവി
ഈ ലോകം പരിശുദ്ധമായിത്തീര്‍ന്നിട്ടുള്ളത് സാവിത്രീദേവിയുടെ പാദസ്പര്‍ശം കൊണ്ടാണ്. ബ്രഹ്മതേജോരൂപിണിയാണ് സത്വസ്വരൂപിണിയായ സാവിത്രീദേവി. സര്‍വ്വതീര്‍ത്ഥങ്ങളും പുണ്യഫലത്തെ പ്രദാനം ചെയ്യുന്നവയായിത്തീരണമെങ്കില്‍ സാവിത്രീദേവിയുടെ സ്പര്‍ശം സിദ്ധിച്ചിരിക്കേണ്ടതാണ്.
5. രാധാദേവി
ധന്യയും മാന്യയും പൂജ്യയുമാണ് രാധാദേവി. ശ്രീകൃഷ്ണപരമാത്മാവിന്റെ വാമാംഗാര്‍ദ്ധ സ്വരൂപിണിയാണ് രാധാദേവി. പണ്ട്, ബ്രഹ്മാവ് ഈ ദേവിയുടെ പാദപദ്മം കാംക്ഷിച്ച് അറുപതിനായിരം വര്‍ഷം തപസ്സു ചെയ്യുകയുണ്ടായി. രാധികാദേവി പഞ്ചപ്രാണസ്വരൂപിണിയാണ്. സര്‍്വസൗഭാഗ്യങ്ങളും തികഞ്ഞ ദേവി തന്നെ രാധാദേവി.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: