തിരുവനന്തപുരം : തെക്കന്‍ കേരളത്തില്‍ മാത്രമല്ല, വടക്കന്‍ കേരളത്തിലും സ്ത്രീധനവുമായി ബന്ധപ്പെട്ട പ്രശ്‌നം രൂക്ഷമാകുന്നു. സ്ത്രീ വിരുദ്ധത യുവാക്കളില്‍ ആക്രമണോത്സുകമായി മാറുന്നെന്നും വനിത കമ്മീഷന് അധ്യക്ഷ പി. സതീദേവി. വനിത കമ്മിഷന്‍ അധ്യക്ഷയായി ചുമതലയേറ്റശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു അവര്‍.
പ്രണയം പോലും ഇന്ന് പുരുഷ മേധാവിത്വ ആക്രമോത്സുകമായി മാറുകയാണ്. കമ്മീഷന് കിട്ടുന്ന പരാതികളില്‍ കൂടുതലും തിരുവനന്തപുരത്തു നിന്നാണ്. വയനാട്ടില്‍ നിന്നാണ് ഏറ്റവും കുറവ്. കേരളത്തില്‍ സ്ത്രീ വിരുദ്ധ ചിന്താഗതി വളരുകയാണെന്നും സതീദേവി പറഞ്ഞു.
തൊഴിലിടങ്ങളില്‍ വനിതകള്‍ പ്രശ്‌നം നേരിടുമ്പോള്‍ പരാതിക്കാര്‍ക്ക് യൂണിയന്‍ ധാര്‍മ്മിക പിന്തുണ നല്‍കണം. മാധ്യമ സ്ഥാപനങ്ങളില്‍ ഉള്‍പ്പടെ പ്രശ്‌ന പരിഹാര സെല്‍ കൂടുതല്‍ കാര്യക്ഷമമാക്കും. മാധ്യമങ്ങള്‍ക്ക് സ്ത്രീപക്ഷ ചിന്താഗതിയും സമത്വവും സ്ത്രീ സൗഹൃദ അന്തരീക്ഷവും ഉറപ്പ് വരുത്തുന്ന മാര്‍ഗരേഖയുടെ കരട് റിപ്പോര്‍ട്ട് തയ്യാറാക്കിയിട്ടുണ്ട്. ഇത് സര്‍ക്കാര്‍ മുമ്പാകെ സമര്‍പ്പിക്കും.
അതേസമയം സംസ്ഥാന വനിത കമ്മീഷന്റെ നിര്‍ദ്ദേശം പോലീസ് പലപ്പോഴും അവഗണിക്കുകയാണ്. അതിനാല്‍ കമ്മിഷന്റെ അധികാര പരിധി സംസ്ഥാന സര്‍ക്കാര്‍ വര്‍ധിപ്പിക്കണം. ഇതിനായി നിയമ ഭേദഗതി വരുത്തേണ്ടതുണ്ട്. ഹരിത പ്രശ്‌നം 11 ന് നടക്കുന്ന വനിത കമ്മിഷന്‍ സിറ്റിങ്ങില്‍ പരിശോധിക്കും. പരാതിക്കാരെ കേട്ട ശേഷം ഉചിതമായ നടപടി സ്വീകരിക്കുമെന്നും സതീദേവി കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: