സാവോപോളോ: ലോകകപ്പ് യോഗ്യത മത്സരത്തില് ബ്രസീലിന് ജയം. അര്ജന്റീനയ്ക്ക് സമനില. ഇക്വഡോര്, പെറു ടീമുകളും വിജയിച്ചു. നെയമര് ഇല്ലാതെയിറങ്ങിയ ബ്രസീല് പിന്നില് നിന്നാണ് വിജയിച്ച് കയറിയത്. വെനസ്വേലയെ മറികടന്നത് ഒന്നിനെതിരെ മൂന്ന് ഗോളുകള്ക്ക്.
എറിക് റാമിറസ് വെനസ്വേലക്കായി ആദ്യ ഗോള് നേടിയെങ്കിലും മാര്ക്വിനോസ് 71-ാം മിനിറ്റില് സമനില പിടിച്ചു. ഗബ്രിയേല് ബാര്ബോസയും അരങ്ങേറ്റ താരം ആന്റണിയും ബ്രസീല് ലീഡ് വര്ധിപ്പിച്ചു. ഇതോടെ പോയിന്റ് പട്ടികയില് ബ്രസീല് ഒന്നാം സ്ഥാനം നിലനിര്ത്തി. അര്ജന്റീന പരാഗ്വേയോട് ഗോള് രഹിത സമനില വഴങ്ങി. ലയണല് മെസിയുള്പ്പെടെയുള്ള താരങ്ങള് കളിച്ചിട്ടും അര്ജന്റീന സമനില വഴങ്ങുകയായിരുന്നു. തെക്കേ അമേരിക്കയിലെ പോയിന്റ് പട്ടികയില് രണ്ടാം സ്ഥാനത്താണ് അര്ജന്റീന. ബ്രസീലിനെക്കാള് എട്ട് പോയിന്റ് പിന്നില്. തെക്കേ അമേരിക്കയില് തോല്വിയറിയാത്ത രണ്ട് ടീമുകളാണ് അര്ജന്റീനയും ബ്രസീലും.
