ലഖ്‌നൗ: ഉത്തര്‍പ്രദേശില്‍ കോണ്‍ഗ്രസിന്റെ ചുക്കാന്‍ പിടിക്കുന്ന പ്രിയങ്കയുടെ രീതി കോണ്‍ഗ്രസിനെ തകര്‍ക്കുന്നതാണെന്ന വിമര്‍ശനത്തിന് തെളിവായി ഇവിടുത്തെ കോണ്‍ഗ്രസ് അധ്യക്ഷന്റെ കൂറുമാറ്റം. തെരഞ്ഞെടുപ്പ് അവലോകനയോഗങ്ങള്‍ക്ക് ഉത്തര്‍പ്രദേശില്‍ എത്തിയ പ്രിയങ്ക ഗാന്ധി വധേര മടങ്ങിപ്പോയതിന് പിന്നാലെയാണ് ഉത്തര്‍പ്രദേശ് കോണ്‍ഗ്രസ് ഉപാധ്യക്ഷന്‍ കോണ്‍ഗ്രസില്‍ നിന്നും രാജിവെച്ചത്.
ഉത്തര്‍പ്രദേശ് നിയമസഭാ തെരഞ്ഞെടുപ്പിന് മാസങ്ങള്‍ മാത്രം ബാക്കിനില്‍ക്കെയാണ് ഉത്തര്‍പ്രദേശ് കോണ്‍ഗ്രസ് സംസ്ഥാന ഉപധ്യക്ഷന്‍ ഗയദീന്‍ അനുരാഗി കോണ്‍ഗ്രസില്‍ നിന്നും രാജിവെച്ചത്. അദ്ദേഹം പിന്നീട് സമാജ് വാദി പാര്‍ട്ടിയില്‍ ചേര്‍ന്നു.
തനിക്ക് കോണ്‍ഗ്രസില്‍ വേണ്ടത്ര പ്രാധാന്യം ലഭിക്കുന്നില്ലെന്നതായിരുന്നു ഗയദീന്‍ അനുരാഗിയുടെ പരാതി. കോണ്‍ഗ്രസ് തെരഞ്ഞെടുപ്പ് അവലോകനയോഗങ്ങള്‍ വെള്ളിയാഴ്ച അവസാനിച്ച ശേഷം പ്രിയങ്ക മടങ്ങിപ്പോയി. വൈകാതെയായിരുന്നു അപ്രതീക്ഷിതമായി കോണ്‍ഗ്രസിന് തിരിച്ചടി നല്‍കി ഗയദീന്‍ അനുരാഗിയുടെ രാജി.
കോണ്‍ഗ്രസിന്റെ പഴയ പ്രതാപം തിരിച്ചുപിടിക്കണമെന്ന പ്രിയങ്ക ഗാന്ധിയുടെ പ്രഖ്യാപനത്തിന് തൊട്ടുപിന്നാലെ പഴയ കോണ്‍ഗ്രസിന്റെ മുഖമായിരുന്ന ഗയദീന്‍ അനുരാഗിയുടെ രാജിയ്‌ക്ക് എന്ത് മറുപടി പറയണമെന്നറിയാതെ കുഴങ്ങുകയാണ് കോണ്‍ഗ്രസ്.
പ്രതികരിക്കാൻ ഇവിടെ എഴുതുക: