സൂപ്പര്താരങ്ങള് അഭിനയത്തിന് പുറമേ ഗാനരംഗത്തും ഒരു പരീക്ഷണം നടത്താറുള്ളത് ഏവര്ക്കും വലിയ കൗതുകം ഉളവാക്കുന്ന ഒരു കാര്യമാണ്. ഇതിനോടകം നിരവധി സിനിമകളില് ഗാനം ആലപിച്ചിട്ടുള്ള മോഹന്ലാല് പുതിയ മലയാള ചിത്രത്തില് വീണ്ടും ഒരു ഗാനം ആലപിക്കാന് ഒരുങ്ങുകയാണ്. യുവതാരനിരയില് ഏറെ ശ്രദ്ധേയനായ ഷെയിന് നിഗം നായകനായി ടി.കെ രാജീവ് കുമാര് സംവിധാനം ചെയ്യുന്ന പുതിയ ചിത്രത്തിലാണ് മോഹന്ലാല് ഗാനം ആലപിക്കുന്നത്.
ഷെയിന് നിഗത്തിന് ഒപ്പം വിനയ് ഫോര്ട്ടും ചിത്രത്തില് പ്രധാന കഥാപാത്രമായി എത്തുന്നുണ്ട്. ചിത്രത്തിന്റെ രണ്ടാമത് ബില്ബോര്ഡ് കോട്ടയം നസീര് പുറത്തിറക്കി. ബര്മൂഡയുടെ ഡിസൈനര് ശ്രീജേഷ് കെ ദാമോധറിനെ പരിജയപ്പെടുത്തിയാണ് രണ്ടാമത്തെ പോസ്റ്റര് ഇറക്കിയിരിക്കുന്നത്.
നിലവില് ജീത്തു ജോസഫ് സംവിധാനം ചെയ്യുന്ന ചിത്രത്തിന്റെ ഷൂട്ടിങ്ങ് പൂര്ത്തിയായതിനു ശേഷം ഈ മാസം അവസാനം കൊച്ചിയിലെത്തുന്ന മോഹന്ലാല് ചിത്രത്തിന് വേണ്ടി ഗാനം ആലപിക്കും എന്നാണ് റിപ്പോര്ട്ടുകള് സൂചിപ്പിക്കുന്നത്.
ആരാധകര് വളരെ പ്രതീക്ഷയോടെ ഉറ്റുനോക്കുന്ന ഈ ഗാനം ചിട്ടപ്പെടുത്തുന്നത് പ്രശസ്ത സംഗീത സംവിധായകന് രമേശ് നാരായണനാണ്. വരികള് എഴുതുന്നത് വിനായക് ശശികുമാര്. ഷെയിന് നിഗം ചിത്രത്തിലും ഗായകനായി എത്തുന്നതോടെ മോഹന്ലാല് തന്റെ കരിയറില് ഏകദേശം അമ്പതോളം ചലച്ചിത്ര ഗാനങ്ങള് ആലപിച്ചു എന്ന വിശേഷണത്തിന് അര്ഹനാവുകയും ചെയ്യും. 24 ഫ്രെയിംസിന്റെ ബാനറില് സൂരജ് സി.കെ, ബിജു സി.ജെ., ബാദുഷ എന്.എം. എന്നിവര് ചേര്ന്നാണ് ചിത്രം നിര്മ്മിക്കുന്നത്. കൃഷ്ണകുമാര് പിങ്കിയുടെതാണ് കഥ, അഴകപ്പന്, ഷെല്ലി കാലിസ്റ്റ് എന്നിവര് ക്യാമറയും കൈകാര്യം ചെയ്യുന്നു. പിആര്ഒ- പി.ശിവപ്രസാദ്, മഞ്ജു ഗോപിനാഥ്
