തിരുവനന്തപുരം : കിണര്‍ കുഴിക്കുകയായിരുന്ന തൊഴിലാളിയെ കല്ലെറിഞ്ഞ് കൊല്ലാന്‍ ശ്രമം. പാറശ്ശാല സ്വദേശി സാബുവിനെ സുഹൃത്ത് ബിനുവാണ് കല്ലെറിഞ്ഞ് കൊല്ലാന്‍ ശ്രമം നടത്തിയത്. ഇരുവരും തമ്മില്‍ കഴിഞ്ഞ ദാവസമുണ്ടായ അഭിപ്രായ വ്യത്യാസമാണ് സംഭവത്തിന് പിന്നില്‍.
ഇന്ന് രാവിലെ എട്ട് മണിയോടെയാണ് സംഭവം. പണി നടക്കുന്ന കിണറ്റിലിറങ്ങിയിരുന്ന സാബുവിന്റെ ദേഹത്തേക്ക് ബിനു വലിയ കല്ലുകളെടുത്ത് ഇടുകയായിരുന്നു. ആദ്യം ഒഴിഞ്ഞുമാറിയെങ്കിലും പിന്നീട് എറിഞ്ഞത് സാബുവിന്റെ ദേഹത്തേയ്‌ക്ക് പതിക്കുകയും ഇയാള്‍ കിണറ്റില്‍ കുഴഞ്ഞുവീഴുകയുമായിരുന്നു. തുടര്‍ന്ന് ഫയര്‍ ഫോഴ്‌സ് എത്തിയാണ് പുറത്തെടുത്തത്.
കല്ലെറിഞ്ഞ ബിനുവിന് വേണ്ടി പോലീസ് തിരച്ചിലിലാണ്. ഇയാള്‍ ഒളിവില്‍ പോയതായാണ് സൂചന. സാബുവും ബിനുവും നേരത്തെ ഒരുമിച്ച് ജോലിചെയ്യുന്നവരായിരുന്നു. കൂലിത്തര്‍ക്കമാണ് ക്രൂരകൃത്യത്തിലേക്ക് നയിച്ചതെന്നാണ് വിവരം. സാബു നെയ്യാറ്റിന്‍കര ആശുപത്രിയില്‍ ചികിത്സയിലാണ്. ബിനുവിന് തന്നോട് മുന്‍ കാല വൈരാഗ്യമുണ്ടെന്നും തന്നെ കൊല്ലാന്‍ ശ്രമിച്ചതാണെന്നും പരിക്കേറ്റ സാബു പറഞ്ഞു.
പ്രതികരിക്കാൻ ഇവിടെ എഴുതുക: