കൊച്ചി : കോവിഡ് ബാധിച്ച് മരിച്ച ദളിത് വൃദ്ധന്റെ മൃതദേഹം ആശുപത്രി അധികൃതര്‍ വിട്ടു നല്‍കിയത് പുഴുവരിച്ച നിലയില്‍. കളമശ്ശേരി മെഡിക്കല്‍ കോളജ് അധികൃതര്‍ക്കെതിരെ മുഖ്യമന്ത്രിക്ക് പരാതി. മരിച്ച പെരുമ്പാവൂര്‍ സ്വദേശി കുഞ്ഞുമോന്റെ(85) മകന് അനില്‍ കുമാറാണ് പരാതി നല്‍കിയത്.
ഓഗസ്റ്റ് 29 ന് പെരുമ്പാവൂര്‍ താലൂക്ക് ആശുപത്രിയില്‍ ആയിരുന്നു ആദ്യം കുഞ്ഞുമോനെ പ്രവേശിപ്പിച്ചത്. പിന്നീട് അമ്പലമുകള്‍ കോവിഡ് ആശുപത്രിയിലേക്ക് മാറ്റി. ആരോഗ്യനില വഷളായതോടെ സെപ്റ്റംബര്‍ ആറിന് കളമശ്ശേരി മെഡിക്കല്‍ കോളേജില്‍ പ്രവേശിപ്പിച്ചു.
കഴിഞ്ഞ ചൊവ്വാഴ്ചയാണ് കുഞ്ഞുമോന്‍ മരിച്ചതായി ആശുപത്രി അധികൃതര്‍ ബന്ധുക്കളെ വിളിച്ച് അറിയിക്കുന്നത്. പിറ്റേന്ന് തന്നെ സംസ്‌കരിക്കുകയും ചെയ്തു. സംസ്‌കാരത്തിനായി മൃതദേഹം പെരുമ്പാവൂര്‍ നഗരസഭ ശ്മശാനത്തില്‍ സംസ്‌കാരത്തിന് കൊണ്ടുവന്നപ്പോഴാണ് പുഴുക്കളെ കണ്ടത്. ഇക്കാര്യം അധികൃതരുടെ ശ്രദ്ധയില്‍പ്പെടുത്തിയെങ്കിലും ധൃതിപ്പെട്ട് സംസ്‌കാരം നടത്തുകയായിരുന്നു.
കുഞ്ഞുമോന്‍ മരിച്ച് ദിവസങ്ങള്‍ക്ക് ശേഷമാണ് ആശുപത്രി അധികൃതര്‍ അറിയിച്ചത്. മരണ വിവരം മനപ്പൂര്‍വ്വം മറച്ചുവെച്ചു. സഭവത്തില്‍ അന്വേഷണം നടത്തണമെന്നും ആവശ്യപ്പെട്ടാണ് അനില്‍ കുമാര്‍ പരാതി നല്‍കിയിരിക്കുന്നത്.
എന്നാല്‍ ആരോപണം കളമശ്ശേരി മെഡിക്കല്‍ കോളജ് അധികൃതര്‍ നിഷേധിച്ചു. ഇത്തരത്തിലുള്ള വീഴ്ച കളമശ്ശേരി മെഡിക്കല്‍ കോളേജിന്റെ ഭാഗത്തു നിന്നും ഉണ്ടായിട്ടില്ലെന്ന് മെഡിക്കല്‍ കോളേജ് സൂപ്രണ്ട് അറിയിച്ചു. മുമ്പ് കളമശ്ശേരി മെഡിക്കല്‍ കോളേജില്‍ ചികിത്സയിലായുന്ന രോഗി മരിച്ചത് ആശുപത്രി അധികൃതരുടെ ഭാഗത്തു നിന്നുള്ള വീഴ്ചയാണെന്ന് ആരോപണം ഉയര്‍ന്നിട്ടുണ്ട്. വാട്‌സ്ആപ്പിലൂടെ ലഭിച്ച ശബ്ദ സന്ദേശത്തിലാണ് ഇക്കാര്യം പുറത്തുവന്നത്.
പ്രതികരിക്കാൻ ഇവിടെ എഴുതുക: