മലപ്പുറം : എആര്‍ നഗര്‍ ബാങ്കിലെ മുസ്ലിം ലീഗ് നേതാവ് കുഞ്ഞാലിക്കുട്ടിയുടെ കള്ളപ്പണ നിക്ഷേപ തട്ടിപ്പ് പുറത്തുകൊണ്ടുവരുന്നതില്‍ മുഖ്യമന്ത്രി പിണറായി വിജയന്‍ പിന്തുണയ്‌ക്കുന്നതായി കെ.ടി. ജലീല്‍ എംഎല്‍എ. ബാങ്കില്‍ നടക്കുന്ന തട്ടിപ്പുമായി ബന്ധപ്പെട്ട് എന്‍ഫോഴ്‌സ്‌മെന്റ് ഡയറക്ടറേറ്റ് ഓഫിസിലെത്തിയതിന് ശേഷം ഫേസ്ബുക്കിലൂടെയാണ് ജലീലിന്റെ ഈ പ്രതികരണം.
എആര്‍ നഗര്‍ ബാങ്കില്‍ സെക്രട്ടറി ഹരികുമാറിനെ മുന്‍നിര്‍ത്തി കുഞ്ഞാലിക്കുട്ടിയും സംഘവും നടത്തുന്ന കള്ളപ്പണ- അഴിമതി- ഹവാല കേസ് പുറത്തുകൊണ്ടുവരുന്നതിന് മുഖ്യമന്ത്രി നല്‍കുന്ന കരുത്ത് അളവുറ്റതാണ്. തട്ടിപ്പ് പുറത്തുകൊണ്ടുവരേണ്ടത് ഓരോ പൗരന്റേയും ബാധ്യതയാണ്. അത് നിര്‍വഹിക്കുന്നതില്‍ മുന്നിലാണ് പിണറായി സര്‍ക്കാര്‍. സാമ്പത്തിക തട്ടിപ്പ് പുറത്തുകൊണ്ടുവരേണ്ടത് ഓരോ പൗരന്റേയും കടമയാണ്. ഇതിനായി മുഖ്യമന്ത്രി മുന്നിലുണ്ടെന്ന സന്ദേശം പോരാളികള്‍ക്ക് പകരുന്ന ആവേശത്തിന് സമാനതകളില്ല.
സാധാരണ ഗതിയില്‍ ഒരു പ്രാഥമിക സഹകരണ സംഘത്തില്‍ പതിനായിരത്തിനും പതിനയ്യായിരത്തിനുമിടയില്‍ അംഗങ്ങളും ഇരുപതിനായിരത്തില്‍ താഴെ അക്കൗണ്ടുകളും ഉണ്ടാകാനേ ഇടയുള്ളൂ. കൂടിയാല്‍ ഇരുപതിനായിരത്തോളം അംഗങ്ങളും ഇരുപത്തയ്യായിരത്തോളം അക്കൗണ്ടുകളും. എന്നാല്‍ എആര്‍ നഗര്‍ പ്രാഥമിക കാര്‍ഷിക സഹകരണ സംഘത്തില്‍ അറുപതിനായിരത്തിലധികം അംഗങ്ങളും എണ്‍പതിനായിരത്തിലധികം അക്കൗണ്ടുകളുമാണ് ഉള്ളതെന്നും ജലീല്‍ കുറ്റപ്പെടുത്തി.
എന്‍ഫോഴ്‌സ്‌മെന്റ് മുമ്പാകെ ജലീല്‍ നല്‍കിയ വെളിപ്പെടുത്തല്‍ മുഖ്യമന്ത്രി ആദ്യം തള്ളുകയാണ് ഉണ്ടായത്. അതിനു പിന്നാലെ കേസില്‍ എന്‍ഫോഴ്‌സ്‌മെന്റ് എന്തിന് അന്വേഷണം നടത്തുന്നുവെന്നും മുഖ്യമന്ത്രി ചോദിച്ചിരുന്നു. തുടര്‍ന്ന് മുഖ്യമന്ത്രി തനിക്ക് പിതൃതുല്യനാണെന്നും അദ്ദേഹത്തിന് തന്നെ ശാസിക്കാനുള്ള സ്വാതന്ത്ര്യമുണ്ട്. കുഞ്ഞാലിക്കുട്ടിക്കെതിരായ പോരാട്ടം തുടരുമെന്നും അദ്ദേഹം എഫ്ബിയിലൂടെ വെളിപ്പെടുത്തി.
തുടര്‍ന്ന് എന്‍ഫോഴ്‌സ്‌മെന്റ് മുമ്പാകെ തെളിവുകള്‍ നല്‍കാന്‍ ഹാജരാകുന്നതിന് മുമ്പും മുഖ്യമന്ത്രി ജലീലിനെ വിളിപ്പിച്ചിരുന്നു. എന്‍ഫോഴ്‌സ്‌മെന്റ് മുമ്പാകെ വെളിപ്പെടുത്തല്‍ നടത്തുമ്പോള്‍ ജാഗ്രത വേണം. കള്ളപ്പണക്കേസില്‍ എന്‍ഫോഴ്‌സ്‌മെന്റ് അന്വേഷിക്കുന്നത് പാര്‍ട്ടി വിരുദ്ധമാണെന്നുമായിരുന്നു മുഖ്യമന്ത്രി അറിയിച്ചത്. കേസില്‍ ജലീല്‍ മൊഴി നല്‍കിയതിലും കുഞ്ഞാലിക്കുട്ടിക്കെതിരെ തെളിവുകള്‍ കൈമാറിയതിലും സിപിഎമ്മിനുള്ളില്‍ അതൃപ്തിയുണ്ട്.
പ്രതികരിക്കാൻ ഇവിടെ എഴുതുക: