മലയാളിയുടെ മമ്മൂക്കയ്‌ക്ക് കലണ്ടറില്‍ ഇന്ന് എഴുപത്. ചെറുപ്പം പെയ്തു തോരാത്ത അഭിനയ വര്‍ഷങ്ങളില്‍ പകര്‍ന്നാടിയ വേഷങ്ങള്‍ നിരവധി. മഹാനടന് സത്യന്റെ കാലു തൊട്ട് അനുഭവങ്ങള്‍ പാളിച്ചകളിലൂടെ വെള്ളിത്തിരയിലേക്ക് കടന്നുവന്ന വൈക്കം ചെമ്പില്‍ പാനിപ്പറമ്പില്‍ മുഹമ്മദ്കുട്ടി ഇസ്മയിലിന്റെ സിനിമാനുഭവങ്ങള്‍ അര നൂറ്റാണ്ടായി വെള്ളിത്തിരയിലെ വിസ്മയമായി തുടരുകയാണ്.
പഴശ്ശിയായി, അംബേദ്കറായി, ബഷീറായി, പൊന്തന്‍മാടയായി, ഭാസ്‌കരപ്പട്ടേലരായി, വടക്കന്‍ വീരഗാഥയിലെ ചന്തുവായി, വാറുണ്ണിയായി… വേഷപ്പകര്‍ച്ചയില്‍ ഇതിഹാസമായി മാറിയ പ്രിയതാരത്തിന് പിറന്നാള്‍ മംഗളങ്ങള്‍ നേരുകയാണ് മലയാളം. ലോകമെങ്ങുമുള്ള മലയാളി പ്രേക്ഷകര്‍ മെഗാസ്റ്റാറിന്റെ പിറന്നാള്‍ ആഘോഷമാക്കുകയാണ്. മോഹന്‍ലാല്‍ പിറന്നാള്‍ത്തലേന്ന് തന്നെ മമ്മൂട്ടിക്ക് മംഗളം നേര്‍ന്നു. ചലച്ചിത്ര, സാമൂഹിക, സാംസ്‌കാരിക മേഖലകളിലെ പ്രമുഖര്‍ ഒരു ദിവസം മുമ്പേ അദ്ദേഹത്തിന് പിറന്നാള്‍ ആശംസിച്ചു.
പ്രതികരിക്കാൻ ഇവിടെ എഴുതുക: