ലണ്ടന്: ഇന്ത്യക്കെതിരായ നാലാം ക്രിക്കറ്റ് ടെസ്റ്റില് ഇംഗ്ലണ്ടിന്റെ വിജയലക്ഷ്യം 368 റണ്സ്. രണ്ടാം ഇന്നിങ്സില് തകര്പ്പന് ബാറ്റിങ് പുറത്തെടുത്ത ഇന്ത്യ 466 റണ്സിന് പുറത്തായി. ഇതോടെ ഇന്ത്യയുടെ ലീഡ് 367 റണ്സായി.
തുടര്ന്ന് രണ്ടാം ഇന്നിങ്സ് ആരംഭിച്ച ഇംഗ്ലണ്ട് നാലാം ദിവസം കളി നിര്ത്തുമ്പോള് വിക്കറ്റ് നഷ്ടപ്പെടാതെ 77 റണ്സ് എടുത്തിട്ടുണ്ട്.
ഒന്നാം ഇന്നിങ്സില് ഇംഗ്ലീഷ് ബൗളിങ്ങിനു മുന്നില് മുട്ടുമടക്കിയ ഇന്ത്യന് ബാറ്റിങ് നിര രണ്ടാം ഇന്നിങ്സില് വര്ധിത വീര്യത്തോടെ തിരിച്ചടിക്കുന്ന കാഴ്ചയ്ക്കാണ് കെന്നിങ്ടണ് ഓവല് സാക്ഷിയായത്. മൂന്ന് വിക്കറ്റ് നഷ്ടത്തില് 270 റണ്സെന്ന നിലയില് നാലാം ദിനം ബാറ്റിങ് ആരംഭിച്ച ഇന്ത്യ 196 റണ്സ് കൂടി കൂട്ടിച്ചേര്ത്താണ് പുറത്തായത്.
സെഞ്ചുറി നേടിയ രോഹിത് ശര്മ, അര്ധസെഞ്ചുറികള് നേടിയ ചേതേശ്വര് പൂജാര, ഋഷഭ് പന്ത്, ഷാര്ദുല് താക്കൂര് എന്നിവരുടെ ഇന്നിങ്സുകളാണ് ഇന്ത്യയെ മികച്ച സ്കോറിലെത്തിച്ചത്. കെ.എല്. രാഹുല് (46), ക്യാപ്റ്റന് വിരാട് കോലി (44) എന്നിവരും ഇന്ത്യന് സ്കോറിലേക്ക് മികച്ച സംഭാവനകള് നല്കി. റണ്ണൊന്നുമെടുക്കാതെ പുറത്തായ അജിന്ക്യ രഹാനെയും 17 റണ്സിന് പുറത്തായ രവീന്ദ്ര ജഡേജയുമാണ് നിരാശപ്പെടുത്തിയത്.
നാലാം ദിനം ബാറ്റിങ് ആരംഭിച്ച ഇന്ത്യക്ക് രവീന്ദ്ര ജഡേജ, അജിങ്ക്യ രഹാനെ, ക്യാപ്റ്റന് വിരാട് കോലി എന്നിവരുടെ വിക്കറ്റുകള് നേരത്തെ നഷ്ടമായി. ജഡേജയെയും രഹാനെയേയും ക്രിസ് വോക്സ് മടക്കിയപ്പോള് കോലിയെ മോയിന് അലി പുറത്താക്കി. ഏഴാം വിക്കറ്റില് ഒന്നിച്ച ഋഷഭ് പന്ത്-ഷര്ദുല് താക്കൂര് സഖ്യമാണ് പിന്നീട് ഇന്ത്യന് തിരിച്ചടിയുടെ നേതൃത്വമേറ്റെടുത്തത്. ഏഴാം വിക്കറ്റില് ഇരുവരും 100 റണ്സിന്റെ കൂട്ടുകെട്ടുണ്ടാക്കി. സ്കോര് 412-ല് എത്തിയശേഷമാണ് ഈ കൂട്ടുകെട്ട് പിരിഞ്ഞത്. 72 പന്തുകളില് നിന്ന് 60 റണ്സെടുത്ത താക്കൂറിനെ പുറത്താക്കി റൂട്ടാണ് ഈ കൂട്ടുകെട്ട് പിരിച്ചത്. തൊട്ടുപിന്നാലെ 50 റണ്സെടുത്ത ഋഷഭ് പന്തും മടങ്ങി. പിന്നീട് എത്തിയ വാലറ്റക്കാരെല്ലാം ഭേദപ്പെട്ട ബാറ്റിങ് നടത്തിയതോടെ ഇന്ത്യന് സ്കോര് 466-ല് എത്തി. ജസ്പ്രീത് ബുംറ (24), ഉമേഷ് യാദവ് (25) എന്നിവരും ഇന്ത്യന് സ്കോറിലേക്ക് സംഭാവന നല്കി. മുഹമ്മദ് സിറാജ് മൂന്ന് റണ്സോടെ പുറത്താകാതെ നിന്നു. ഇംഗ്ലണ്ടിന് വേണ്ടി ക്രിസ് വോക്സ് മൂന്നും റോബിന്സണ്, മോയീന് അലി രണ്ടും വിക്കറ്റുകള് വീഴ്ത്തി.
