തിരുവനന്തപുരം: മോദി സര്ക്കാരിന്റെ മാതൃക പിന്തുടര്ന്ന് കേരളത്തിലെ പിണറായി വിജയന് സര്ക്കാരും. ആധുനിക സജ്ജീകരണങ്ങളോടെ പൊതു നിരത്തുകള്ക്ക് അരികെ കൂടുതല് ശൗചാലയങ്ങള് നിര്മ്മിക്കും. ‘ടേക്ക് എ ബ്രേക്ക്’ എന്ന പേരിലാണ് ശുചിമുറി സമുച്ചയങ്ങളൊരുക്കുന്നത്.
വഴി യാത്രികര്ക്കായി ദേശീയ, സംസ്ഥാന പാതയോരങ്ങളില് ആധുനിക സജ്ജീകരണങ്ങളോടെ വിശ്രമകേന്ദ്രങ്ങളൊരുക്കുന്ന ‘ടേക്ക് എ ബ്രേക്ക്’ പദ്ധതിയില് 100 പൊതുശുചിമുറി സമുച്ചയങ്ങളും വഴിയോര വിശ്രമകേന്ദ്രങ്ങളും സെപ്തംബര് 7ന് നാടിന് സമര്പ്പിക്കും.
സ്ത്രീകള്ക്കും കുട്ടികള്ക്കുമുള്പ്പെടെ ഏത് സമയത്തും വൃത്തിയായും സുരക്ഷിതമായും ഉപയോഗിക്കത്തക്ക രീതിയില് ആധുനിക സംവിധാനങ്ങളടങ്ങുന്ന ശുചിമുറി സമുച്ചയങ്ങളും കോഫി ഷോപ്പുകളോടു കൂടിയ ഉന്നതനിലവാരത്തിലുളള വിശ്രമ കേന്ദ്രങ്ങളുമാണ് തദ്ദേശസ്വയംഭരണ സ്ഥാപനങ്ങളുടെ നേതൃത്വത്തില് രണ്ടാം ഘട്ടത്തില് നിര്മാണം പൂര്ത്തീകരിച്ചത്.എല്ലാ ടോയിലറ്റുകളിലും സാനിട്ടറി നാപ്കിന് ഡിസ്ട്രോയര്, അജൈവമാലിന്യ സംഭരണ സംവിധാനങ്ങള്, അണുനാശിനികള് എന്നിവ സജ്ജീകരിച്ചിട്ടുണ്ട്.
524 എണ്ണം ശുചിമുറി സമുച്ചയങ്ങളുടെ നിര്മാണം പുരോഗതിയിലാണ്. കുടുംബശ്രീ പ്രവര്ത്തകര്ക്കായിരിക്കും നടത്തിപ്പ് ചുമതല. തിരുവനന്തപുരം 13, കൊല്ലം 13, പത്തനംതിട്ട 14, ആലപ്പുഴ 9, കോട്ടയം 10, ഇടുക്കി 1, എറണാകുളം 19, തൃശ്ശൂര് 4, പാലക്കാട് 1, കോഴിക്കോട് 2, കണ്ണൂര് 4, കാസര്കോട് 10 എന്നിങ്ങനെയാണ് ടേക് എ ബ്രേക്ക് ശുചിമുറി സമുച്ചയങ്ങളുടെ ജില്ല തിരിച്ചുള്ള വിവരം. മോദി സര്ക്കാര് ശൗചാലയങ്ങള് നിര്മ്മിച്ച് തുടങ്ങിയപ്പോള് ഏറ്റവുമധികം കളിയാക്കിയത് സിപിഎമ്മിന്റെ നേതൃത്വത്തിലുള്ള ഇടതുപക്ഷ സൈബര് വിങ്ങാണ്. മോദി തുടക്കമിട്ട പദ്ധതി മാതൃകയാക്കിയാണ് ഇപ്പോള് പിണറായി നേതൃത്വം നല്കുന്ന എല്ഡിഎഫ് സര്ക്കാരും കൂടുതല് പൊതുശൗലാചയങ്ങള് തുറക്കുന്നത്.
