മുംബൈ: പ്രശസ്ത ടെലിവിഷന്‍ താരം സിദ്ധാര്‍ത്ഥ് ശുക്ല (40) അന്തരിച്ചു. മുംബൈയില്‍ ഹൃദയാഘാതം മൂലമാണ് അന്ത്യമെന്നാണ് പ്രാഥമിക നിഗമനം. സിദ്ധാര്‍ത്ഥ് ശുക്ലയുടെ ശരീരത്തില്‍ മുറിവുകളൊന്നും പറ്റിയിട്ടില്ല. മരണകാരണം ഇനിയും കണ്ടെത്താനായിട്ടില്ല. അന്വേഷണത്തിനായി ശുക്ലയുടെ വസതിയില്‍ ഒരു പോലീസ് സംഘം ഉണ്ട്’, മുംബൈ പോലീസ് പുറത്തിറക്കിയ പ്രസ്താവനയില്‍ പറയുന്നു. ഇന്നലെ രാത്രി ഉറങ്ങാന്‍ കിടന്ന സിദ്ധാര്‍ത്ഥ് രാവിലെ എഴുന്നേല്‍ക്കാതെ വന്നതോടെ നടത്തിയ അന്വേഷണത്തിലാണ് മരിച്ച നിലയില്‍ മുറിയില്‍ കണ്ടെത്തിയത്. ഉടന്‍ കൂപ്പര്‍ ആശുപത്രിയില്‍ എത്തിച്ചു.
ശരീര സൗന്ദര്യത്തിലടക്കം ആരോഗ്യകാര്യങ്ങള്‍ അതീവ ശ്രദ്ധ പുലര്‍ത്തിയിരുന്ന നടനാണ് സിദ്ധാര്‍ത്ഥ്. മറ്റ് ആരോഗ്യപ്രശ്‌നങ്ങളൊന്നും ഇല്ലെന്നാണ് ബന്ധുക്കള്‍ നല്‍കുന്ന സൂചന. ഇന്നു തന്നെ നടക്കുന്ന പോസ്റ്റ് മോര്‍ട്ടത്തിനു ശേഷമേ മരണകാരണം അന്തിമമായി സ്ഥിരീകരിക്കൂ. ബിഗ് ബോസ് 13 എന്ന റിയാലിറ്റി ഷോയിലും വിജയി ആണ് സിദ്ധാര്‍ത്ഥ്. 2014 ല്‍ ഹംപ്റ്റി ശര്‍മ്മ കി ദുല്‍ഹാനിയ എന്ന ചിത്രത്തിലൂടെയാണ് അദ്ദേഹം ബോളിവുഡില്‍ അരങ്ങേറ്റം കുറിച്ചിരുന്നു. സിദ്ധാര്‍ത്ഥിന്റെ അപ്രതീക്ഷിത മരണത്തില്‍ ആരാധകരും പ്രമുഖരും അഭ്യുദയകാംക്ഷികളും അഗാധമായ ഞെട്ടല്‍ പ്രകടിപ്പിച്ചു. നിരവധി സൂപ്പര്‍ ഹിറ്റ് സീരിയലുകളിലെ നായകന്‍ കൂടിയായിരുന്നു സിദ്ധാര്‍ത്ഥ്.
പ്രതികരിക്കാൻ ഇവിടെ എഴുതുക: