മാലി: തുടര്‍ച്ചയായി രണ്ടാം വിജയം നേടിയ എടികെ മോഹന്‍ ബഗാന് എഎഫ്‌സി കപ്പിന്റെ നോക്കൗട്ടിനരികില്‍. ഗ്രൂപ്പ് ഡിയില്‍ നാളെ ബസുന്ധര കിങ്ങ്‌സിനെതിരായ മത്സരത്തില്‍ സമനില നേടിയാല്‍ എടികെ മോഹന്‍ ബഗാന് നോക്കൗട്ടില്‍ കടക്കാം.
ഗ്രൂപ്പിലെ രണ്ടാം മത്സരത്തില്‍ എടികെ ഒന്നിനെതിരെ മൂന്ന് ഗോളുകള്‍ക്ക് മാലിദീപിലെ മാസിയ സ്‌പോര്‍ട്‌സ് ആന്‍ഡ് റിക്രിയേഷന്‍ ക്ലബ്ബിനെ പരാജയപ്പെടുത്തി. ഈ വിജയത്തോടെ രണ്ട് മത്സരങ്ങളില്‍ ആറു പോയിന്റുമായി എടികെ മോഹന്‍ ബഗാന് ഒന്നാം സ്ഥാനത്ത് തുടരുകയാണ്. ആദ്യ മത്സരത്തില്‍ അവര്‍ ബെംഗളൂരു എഫ്‌സിയെ തോല്‍പ്പിച്ചിരുന്നു. മാസിയ ക്ലബ്ബിനെതിരെ ആദ്യപകുതിയില്‍ ഒരു ഗോളിന് പിന്നിട്ടുനിന്ന എടികെ മോഹന്‍ ബഗാന് ശക്തമായ തിരിച്ചുവരവിലൂടെയാണ് വിജയം പിടിച്ചത്. ഇരുപത്തിയഞ്ചാം മിനിറ്റില്‍ ഇബ്രാഹിം ഐഷാം മാസിയയെ മുന്നിലെത്തിച്ചു.
രണ്ടാം പകുതിയില്‍ മോഹന്‍ ബഗാന് മൂന്ന് ഗോള്‍ തിരിച്ചടിച്ച് വിജയം സ്വന്തമാക്കി. 48-ാം മിനിറ്റില്‍ ലിസ്റ്റണ്‍ കൊളാക്കോ, 63-ാം മിനിറ്റില്‍ റോയ് കൃഷ്ണ, 77-ാം മിനിറ്റില്‍ മന്‍വീര്‍ സിങ് എന്നിവരാണ് ഗോളുകള്‍ നേടിയത്. നാളെ അവസാന ഗ്രൂപ്പ് മത്സരത്തില്‍ എടികെ മോഹന്‍ ബഗാന് ബസുന്ധര കിങ്ങ്‌സിനെ നേരിടും. വൈകിട്ട്് 4.30 നാണ് കിക്കോഫ്. കഴിഞ്ഞ ദിവസം നടന്ന മറ്റൊരു മത്സരത്തില്‍ ബെംഗളൂരു എഫ്‌സി ബസുന്ധര കിങ്ങ്‌സുമായി ഗോള്‍ രഹിത സമനില പിടിച്ചു. ഇതോടെ ബെംഗളൂരു എഫ് സി പുറത്തായി.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: