കട്ടപ്പന: ഇഷ്ടികക്കളത്തില്‍ ലോഡ് കയറ്റി മുന്നോട്ടെടുത്ത മിനി ടിപ്പര്‍ ലോറിയുടെ അടിയില്‍പെട്ട് ഒന്നര വയസുകാരന് ദാരുണാന്ത്യം. ആസം സ്വദേശികളായ ദുലാല്‍ ഹൈസന്‍-ഖദീജ ദമ്പതികളുടെ മകന്‍ മസൂദ് റബ്ബാരിയാണ് മരിച്ചത്. ചേറ്റുകുഴി എസി കണ്ടത്ത് പ്രവര്‍ത്തിക്കുന്ന ഇഷ്ടിക കളത്തിലെ തൊഴിലാളികളാണ് ഇരുവരും.
ചൊവ്വാഴ്ച രാവിലെ 8.45 ഓടെയാണ് അപകടം. 5 വര്‍ഷമായി ഇവിടെ ജോലി ചെയ്യുന്ന ദുലാലും കുടുംബവും ഇഷ്ടിക കളത്തിനുള്ളിലെ മുറിയിലാണ് താമസിച്ചിരുന്നത്. ലോഡ് കയറ്റിയ ലോറി തിരിച്ച് മുന്നോട്ടെടുക്കുന്നതിനിടെ കുട്ടി അബദ്ധത്തില്‍ വണ്ടിക്കടിയില്‍ പെടുകയായിരുന്നു. ഡ്രൈവറുടെ ശ്രദ്ധയില്‍ പെടാത്തതിനാല്‍ വണ്ടി ഓടിച്ചുപോകുകയും ചെയ്തു. ഇതിന് ശേഷമാണ് ഖദീജയും മറ്റൊരു ബന്ധുവും ഗുരുതരമായി പരിക്കേറ്റ നിലയില്‍ കുട്ടിയെ കണ്ടത്.
ഇവര്‍ കുട്ടിയുമായി റോഡിലെത്തി കാത്തുനില്‍ക്കുന്നതിനിടെ ഇതുവഴി എത്തിയ മറ്റൊരു ലോറിയില്‍ ചേറ്റുകുഴിയില്‍ തന്നെയുള്ള ആശുപത്രിയിലെത്തിച്ചു. എന്നാല്‍ ഇവിടെ ഡോക്ടറില്ലാത്തതിനാല്‍ കട്ടപ്പനയിലെ സ്വകാര്യ ആശുപത്രിയില്‍ എത്തിച്ചെങ്കിലും മരിച്ചിരുന്നു. അപകടത്തിനിടയാക്കിയ ലോറിയുടെ ഡ്രൈവര്‍ ചേറ്റുകുഴി കാവില്‍ മനോജി(40) നെ വണ്ടന്‍മേട് പോലീസ് അറസ്റ്റ് ചെയ്തു. ഇയാള്‍ക്കെതിരെ മനഃപൂര്‍വല്ലാത്ത നരഹത്യയ്‌ക്ക് കേസെടുത്തിട്ടുണ്ട്. വണ്ടിയും കസ്റ്റഡിയിലെടുത്തു. കട്ടപ്പനയിലെ സ്വകാര്യ ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന കുഞ്ഞിന്റെ മൃതദേഹം ഇന്ന് പോസ്റ്റ്മോര്‍ട്ടം നടത്തി ബന്ധുക്കള്‍ക്ക് വിട്ടുകൊടുക്കും.
പ്രതികരിക്കാൻ ഇവിടെ എഴുതുക: