തിരുവനന്തപുരം : ഇന്ത്യയിലെ സ്വാതന്ത്യ്ര സമര സേനാനികൾക്കൊപ്പം ഇ എം എസിന്റെയും , എ കെ ജിയുടെയും പേരുകൾ പറയിക്കാന് ഒരു കുട്ടിയെ നിർബന്ധിക്കുന്ന സിപിഎം നേതാവിന്റെ വീഡിയോ വൈറലായി. ആദ്യമായി സ്വാതന്ത്ര്യപ്പതാക ഉയര്ത്തി സ്വാതന്ത്ര്യദിനം ആഘോഷിക്കുന്ന സിപിഎമ്മിന്റെ ഒരു ചടങ്ങിലെ കുട്ടിയുടെ പ്രസംഗമായിരുന്നു സന്ദര്ഭം.
മഹാത്മാഗാന്ധി, സുഭാഷ് ചന്ദ്രബോസ് , മൗലാനാ അബ്ദുൾ കലാം ആസാദ് , സരോജിനി നായിഡു തുടങ്ങി ഒട്ടേറെ പേരുടെ ത്യാഗത്തിന്റെയും , സഹനത്തിന്റെയും ഫലമാണ് നാം അനുഭവിക്കുന്ന സ്വാതന്ത്യ്രം എന്നായിരുന്നു കുട്ടി സിപിഎം ഒരുക്കിയ ചടങ്ങില് പ്രസംഗിച്ചത് . എന്നാൽ വേദിയില് തൊട്ടടുത്ത് നിന്നിരുന്ന സിപിഎം നേതാവ് കുട്ടിയെ രഹസ്യമായി തൊട്ടു വിളിച്ച് കമ്യൂണിസ്റ്റ് നേതാക്കന്മാരുടെ പേരുകളും പറയാൻ നിർബന്ധിക്കുന്നത് വീഡിയോയില് കാണാം.
ഇഎംഎസ്, എകെജി, പി.കൃഷ്ണപിള്ള എന്നിവരുടെ പേര് കൂടി പറയാനായിരുന്നു സിപിഎം നേതാവിന്റെ നിര്ദേശം. തുടർന്ന് കുട്ടി ‘ഇ.എം.എസ്, എ.കെ.ജി എന്നിവരുടെ ത്യാഗത്തിന്റെ ഫലമാണ് നാം ഈ അനുഭവിക്കുന്ന സ്വാതന്ത്ര്യം എന്ന് നമുക്ക് ഓർമ്മ വേണമെന്നും ‘ പ്രസംഗത്തിൽ പറഞ്ഞു .
കുട്ടിയോട് താന് ഒന്നും പറഞ്ഞില്ലേ എന്ന മട്ടില് കുട്ടിയുടെ കൂടെ നില്ക്കുന്ന സിപിഎം നേതാവിന്റെ ദൃശ്യം ഇപ്പോള് സമൂഹമാധ്യമങ്ങളില് ട്രോളിന് പാത്രമാവുകയാണ്.
