ആലുവ: പത്താം ക്ലാസുകാരിയെ പീഡിപ്പിച്ച് ഗര്ഭിണിയാക്കിയ സംഭവത്തില് അയല്വാസി കൂടിയായ ഓട്ടോറിക്ഷ ഡ്രൈവര് അറസ്റ്റിലായി. തേവക്കല് വികെസി കോളനി ഉറവുണ്ടന്ചാലില് സുജിത്ത് സജീവ് (21)നെയാണ് എടത്തല പോലീസ് അറസ്റ്റ് ചെയ്തത്.
പ്രതിയുടെ അമ്മയുടെ സുഹൃത്തിന്റെ മകളെയാണ് പീഡിപ്പിച്ച് ഗര്ഭിണിയാക്കിയത്. എട്ടാം മാസമാണ് ഗര്ഭിണിയാണെന്ന വിവരം പെണ്കുട്ടിയുടെ വീട്ടുകാര് അറിയുന്നത്. നേരത്തെ പെണ്കുട്ടിയുടെ വയര് വീര്ത്തതിനെ തുടര്ന്ന് സ്വകാര്യ ആശുപത്രിയില് നിന്ന് ഗ്യാസിന് ഗുളിക വാങ്ങി കഴിച്ചിരുന്നു. എന്നിട്ടും കുറവില്ലാത്തതിനെ തുടര്ന്ന് കളമശേരി മെഡിക്കല് കോളേജില് എത്തിച്ച് കഴിഞ്ഞ ദിവസം പരിശോധിച്ചപ്പോഴാണ് എട്ട് മാസം ഗര്ഭിണിയാണെന്ന് പെണ്കുട്ടിയുടെ അമ്മയും അറിയുന്നത്.
പ്രതി പീഡിപ്പിച്ചിരുന്നെങ്കിലും ഗര്ഭിണിയാകുമെന്ന് അറിയില്ലായിരുന്നുവെന്നാണ് പെണ്കുട്ടി മൊഴി നല്കിയത്. പ്രതിയുടെ അച്ഛനും അമ്മയും തമ്മില് വഴക്കിടുമ്പോള് അമ്മക്കൊപ്പം പെണ്കുട്ടിയുടെ വാടക വീട്ടില് താമസിക്കാനെത്താറുണ്ട്. പ്രതിയെ ആലുവ കോടതി 14 ദിവസത്തേക്ക് റിമാന്ഡ് ചെയ്തു.
