ന്യൂഡല്‍ഹി: കെകെ ശൈലജയെ മന്ത്രിയാക്കാത്തില്‍ സിപിഎം കേന്ദ്ര കമ്മിറ്റിയില്‍ പ്രതിഷേധം. മറ്റു സംസ്ഥാനങ്ങളില്‍ നി്ന്നുള്ള അംഗങ്ങളാണ് സിപിഎം സംസ്ഥാന നേതൃത്വത്തിനെതിരെ വിമര്‍ശനവുമായി രംഗത്തുവന്നത്.
എന്നാല്‍ സംസ്ഥാന നേതൃത്വത്തെ ന്യായീകരിച്ച് സിപിഎം ജനറല്‍ സെക്രട്ടറി സീതാറാം യെച്ചൂരി രംഗത്തുവന്നു. കേരളഘടകത്തിന്റെ നയ പ്രകാരമാണ് ശൈലജയെ മാറ്റി നിര്‍ത്തിയതെന്ന് യെച്ചൂരി മറുപടി നല്‍കി. നിശ്ചിത തവണ മത്സരിച്ച മുന്‍മന്ത്രിമാരെയും മുതിര്‍ന്ന നേതാക്കളെയും സ്ഥാനാര്‍ഥികളാക്കിയില്ലെന്നും യെച്ചൂരി ചൂണ്ടിക്കാട്ടി.
സ്വാതന്ത്യ ദിനം വിപുലമായി ആഘോഷിക്കാനും കേന്ദജ്ര കമ്മിറ്റിയില്‍ തീരുമാനമെടുത്തു. നാം നേടിയത് വ്യാജ സ്വാതന്ത്ര്യമാണെന്ന് ഇതുവരെ പറഞ്ഞിരുന്ന സിപിഎം ഇന്ത്യക്ക് സ്വാതന്ത്ര്യം ലഭിച്ചതായി സമ്മതിക്കുന്നത് സ്വാതന്ത്ര്യത്തിന്റെ 75-ാം വാര്‍ഷികാഘോഷ വേളയിലാണ്. ചരിത്രത്തിലാദ്യമായി ദേശീയ പതാക ഉയര്‍ത്താനും പാര്‍ട്ടി തീരുമാനിച്ചു. സിപിഎം കേന്ദ്രക്കമ്മിറ്റിയംഗം സുജന്‍ ചക്രവര്‍ത്തിയാണ് പാര്‍ട്ടി തീരുമാനങ്ങള്‍ അറിയിച്ചത്.
സ്വാതന്ത്ര്യദിനം വലിയ പരിപാടികളോടെ ആഘോഷിക്കാനും പാര്‍ട്ടി ഓഫീസുകളിലെല്ലാം ദേശീയപതാക ഉയര്‍ത്താനും തീരുമാനിച്ചതായും അദ്ദേഹം പറഞ്ഞു. ആദ്യമായാണ് പാര്‍ട്ടി സ്വാതന്ത്ര്യം ആഘോഷിക്കുന്നതെന്നത് സുജന്‍ ചക്രവര്‍ത്തി നിഷേധിച്ചു. മുന്‍പ് പലപ്പോഴും മറ്റു പല തരത്തില്‍ സ്വാതന്ത്ര്യം ആഘോഷിച്ചിട്ടുണ്ടെന്നാണ് അദ്ദേഹത്തിന്റെ വിശദീകരണം. ഫാസിസ്റ്റ് വര്‍ഗീയ ശക്തികള്‍ മൂലം രാജ്യത്തിനുണ്ടാകുന്ന ആപത്തുകള്‍ സംബന്ധിച്ച് ചര്‍ച്ചകള്‍ സംഘടിപ്പിച്ചാണ് സാധാരണ ഞങ്ങള്‍ സ്വാതന്ത്ര്യദിനം ആഘോഷിക്കാറുള്ളത്. എന്നാല്‍ ഇക്കുറി ഞങ്ങള്‍ വിപുലമായിട്ടാണ് ആഘോഷിക്കുന്നത്, 75-ാം വാര്‍ഷികവും നൂറാം വാര്‍ഷികവും എപ്പോഴും ഉള്ളതല്ലല്ലോ, അദ്ദേഹം പറഞ്ഞു. ബംഗാള്‍ ഘടകത്തിന്റെ തീരുമാനം കേരളവും നടപ്പാക്കുന്നുണ്ടോയെന്ന് വ്യക്തമല്ല.
പ്രതികരിക്കാൻ ഇവിടെ എഴുതുക: